هۆشیار زێباری: سووتاندنی گۆڕی حافز ئەسەد کارێکی شەرمەزار کارانەیە

ئاڤا نیوز

 

وەزیری پێشووتری دەرەوەی عێراق دەڵێت، سووتاندنی گۆڕی سەرۆککۆماری پێشووی سووریا لە پارێزگای لازقیە، "کارێکی شەرمەزار کارانەیە" و پێچەوانەی ئەو ئاشتیی و بەخۆداچوونەوەیە کە پێویست دەکات لە سووریای نوێدا هەبێت.

 

وێنە گەورەکە: لەماوەی چەند ڕۆژی ڕابردوو چەکدارانی ئۆپۆزیسیۆنی سووریا چەندین شاری سووریایان کۆنترۆڵکرد و دوای دەستبەسەرداگرتنی شاری دیمەشق کۆتایی بە دەسەڵاتی بەشار ئەسەد هێنرا.

 

زانیاریی زیاتر: چەکدارانی تەحریرولشام دوای کۆنترۆڵکردنی پایتەخت، لێبوردنی گشتییان بۆ هەموو زیندانیان ڕاگەیاند، بەهۆی ئەو بڕیارەوە تەواوی گرتووخانەکانی ئەو وڵاتە چۆڵکران.

 

ئەوەی پێویستە بیزانیت: ڕۆژی چوارشەممە چەند گرتەیەکی ڤیدیۆیی لە تۆڕە کۆمەڵایەتییەکان بڵاوکرانەوە، تیایاندا دەردەکەوێت کە چەند چەکدارێک گۆڕی حافز ئەسەد سەرۆککۆماری پێشووی سووریا دەسوتێنن.

 

لێدوانی فەرمی: هۆشیار زێباری، ئەندامی مەكتەبی سیاسی پارتی و وەزیری پێشووتری دەرەوەی عێراق لە هەژماری خۆی لە تۆڕی کۆمەڵایەتی ئێکس ئاماژەی بەوەشکردوە، "سووتاندنی گۆڕی حافز ئەسەد سەرۆکی پێشوو لە قرداحە، سەرەڕای ئەو نەهامەتیی و هەستکردن بەو ستەمەی لە حکومڕانییەکەی، کارێکی شەرمەزارکارانەیە و دوورە لە هەموو بەهایەکی بەرز و باڵا و ئاشتەوایی لە سووریای نوێ لەگەڵ خۆیی و لەگەڵ جیهانیشدا".