لە هەولێر زیاتر لە 400 دەرفەتی کار ڕادەگەیێنرێت

ئاڤا نیوز

 

بڕیارە لە هەفتەکانی ئایندە دامەزراوەی JOBS.KRD لە پێشانگایەکدا سەدان دەرفەتی کار پێشکەش بە گەنجان و ئەوانە بکات کە خوازیاری دەستکەوتنی کارن.

 

وێنە گەورەکە: بۆ یەکەمجارە لە هەرێمی کوردستان، لە کابینەی نۆیەمدا لەڕێگەی پۆرتاڵێکەوە دەرفەتی کار بۆ دەرچووانی زانکۆ و ئەوانە دەڕەخسێندرێت کە خوازیاری دەستخستنی دەرفەتی کارن.

 

زانیاری بەدەستهاتوو: ئاڤا زانیویەتی، بڕیارە ڕۆژی 21-12-2024 لە هۆتێل ڕۆتانای هەولێر بە بەشداری زیاتر لە 40 کۆمپانیای ناوخۆیی و بیانی، دامەزراوەی JOBS.KRD زیاتر لە 400 دەرفەتی کار ببەخشێت بە گەنجان، هەموو کەسێک دەتوانێت سەردانی پێشانگاکە بکات.

 

زانیاریی زیاتر: ئەوانەی دەیانەوێت کاریان دەستبکەوێت لە پێشانگاکە تیمی JOBS.KRD فۆرمیان بۆ پڕدەکەنەوە، ئەو کارانەش ڕادەگەیێنرێت کە کۆمپانیاکان پێویستیانە. کارەکان بریتی دەبن لە مارکێتینگ، کارگێڕی، فڕۆکەوانی، پیشەسازی و نەوت و چەندین بواری جیاوازی دیکە.

 

بۆچی گرنگە: ڕەخساندنی ئەو ژمارە زۆرەی دەرفەتی کار تەنیا بۆ دەرچووانی زانکۆ نییە، بەڵکو بۆ ئەو قوتابیانەشە کە قۆناغی چوارەمی زانکۆن و دەیانەوێت دوای تەواوکردنی خوێندن کاریان دەستبکەوێت. 

 

باکگراوند: دامەزراوەی JOBS.KRD ڕۆژی 10-1-2024 ڕاگەیێنرا، لەو کاتەوە تا ئێستا زیاتر لە 800 دەرفەتی کاری ڕەخساندووە، 2-9-2024 دامەزراوەکە یاداشتێکی لێکتێگەیشتنی لەگەڵ دەستەی وەبەرهێنان واژۆ کرد لەپێناو زیادکردنی دەستی کاری ناوخۆیی، ئەمەش دوای ئەوە هات کە ئەنجوومەنی وەزیران بڕیاریدا پێویستە لە 75%ـی کارمەندانی کەرتی تایبەت هاونیشتمانی نێوخۆ بن نەک خەڵکی بیانی.