یەکێتی داوای پۆستی سەرۆکی هەرێم دەکات و قوباد تاڵەبانی کاندیدە

ئاڤا نیوز

 

سەرەتای ساڵی نوێ هەردوو شاندی دانوستانکاری پارتی و یەکێتی جارێکی دیکە کۆدەبنەوە. مەحموود محەممەد، گوتەبێژی پارتی بۆ ئاڤا ئاشکرای کردووە، ڕۆژی 7-1-2025، پارتی و یەکێتی سێیەم کۆبوونەوە دەکەن و هەنگاوەکانی پێکهێنانی کابینەی دەیەمی حکومەت تاوتوێ دەکەن.

وێنە گەورەکە: لە دوو کۆبوونەوەی ڕابردوودا پارتی و یەکێتی لێکتێگەیشتنی ئەرێنییان هەبووە. لە دوایین کۆبوونەوەیان کە لە پیرمام کرا، هەردوولا ڕێککەوتن سەرەتا بابەتی کارنامەی حکومەت ببڕێننەوە، بۆ ئەم مەبەستەش لیژنەیەکی هاوبەش پێکهێنراوە و کار لەسەر نووسینی کارنامەکە دەکات بۆ کۆبوونەوەی داهاتوو.

 

لێدوانی فەرمی: ئارێز عەبدوڵڵا، ئەندامی سەركردایەتیی یەكێتی بە ئاڤا نیوزی ڕاگەیاند: داواكارییەكانی ئەمجارەی حیزبەکەی جیاوازە، یەكێتی داوای هاوبەشی دەكات بۆ بەشداریكردن لە حكومەت، ئەویش لەسەر دوو بنەما، هەم ژمارەی پۆستەكان و هەم داڕشتنی پلانی حكومەت و شێوازی بەڕێوەبردنی کوردستان.

زانیاریی تایبەت: ئاڤا زانیویەتی لە کۆبوونەوەکەدا گفتوگۆ لەسەر پۆستە باڵاکان کراوە، هەرچەندە پارتی پۆستی سەرۆکی حکومەت بە مافی خۆی دەزانێت، لەبەرئەوەی براوەی یەکەمی هەڵبژاردنە، ئەوەی دەمێنێتەوە پۆستی سەرۆکی هەرێمە لەگەڵ سەرۆکی پەرلەمان.

ئەوەی پێویستە بیزانیت: یەکێتی داوای پۆستی سەرۆکی هەرێمی کوردستان دەکات و قوباد تاڵەبانی بۆ ئەم پۆستە کاندید دەکات. پێشتر پۆستی سەرۆکی هەرێمی کوردستان بەرامبەر بە پۆستی سەرۆککۆماری عێراق بوو کە سەرۆکی هەرێم بۆ پارتی و سەرۆککۆمار بۆ یەکێتی بوو.

 

ئەمەش بزانە: یەکێتی جگە لەسەرۆکی هەرێمی کوردستان داوای سێ وەزارەتی سیادیشی کردووە، لەوانە "ناوخۆ، سامانە سروشتییەکان  و شارەوانی". لەبەرامبەردا  پارتی داوای وەزارەتە خزمەتگوزارییەکانی کردووە، وەکو کشتوکاڵ و بازرگانی و پیشەسازی، ئەم وەزارەتانە نزیکن لە دیدگای مەسرور بارزانی و دەیەوێت ژێرخان بۆ کوردستان دابنێت. هەروەها پێیوایە لەم سێکتەرانە دەتوانرێ خزمەتێکی گەورە بە خەڵکی کوردستان بکرێ.

وەزارەتە خزمەتگوزارییەکان بۆ بەجێگەیاندنی دیدگای سەرۆکوەزیرانی داهاتوو مەسرور بارزانین
مەسرور بارزانی مەبەستییەتی لەڕێی وەزارەتە خزمەتگوزارییەکانەوە ژێرخانی کوردستان بەهێزتر بکات