سبەی دوایین وادەی گەڕانەوەی داهاتە بۆ گەنجینەکان

ئاڤا نیوز

بەشێکی زۆر لە فەرمانگەکانی حکومەتی هەرێمی کوردستان ئاگادارییان بڵاوکردووەتەوە بەهۆی تەواوبوونی ساڵی داراییەوە، سبەی دوای تەواوبوونی دەوامی ئاسایی چیتر هاووڵاتییان ناتوانن باج و سزاکانیان ڕادەست بکەن تا دوای تەواوبوونی پشووەکانی سەری ساڵ.

 

وێنە گەورەکە: وەزارەتی دارایی و ئابووری هەرێمی کوردستان لە 15-12-2024 هەژماری خەرجی دارایی دادەخات، هەژماری داهات تاوەکو 31-12-2024 بەردەوام دەبێت، بەڵام بەهۆی پشووی سەری ساڵەوە کە لە 25-12-2024 دەست پێدەکات سبەی دوایین وادەیە بۆ ئەوەی بەڕێوەبەرایەتییەکان داهاتەکانیان بگەڕێننەوە گەنجینەکان.

 

لێدوانی فەرمی: سیامەند ئیسماعیل، بەڕێوەبەری گەنجینەی سۆران بە ئاڤای ڕاگەیاند: "24ـی مانگ کۆتا وادە دەبێت و پێویستە هەموو بەڕێوەبەرایەتیی و فەرمانگەکان داهاتیان بگەڕێنەوە گەنجینەکان لەوێشەوە ڕەوانەی وەزارەتی دارایی دەکرێت لە 31-12-2024 هەژماری کۆتایی ساڵ دادەخرێت."

 

ئەوەی پێویستە بیزانیت: بەشێک لەو بەڕێوەبەرایەتییانەی کە داشکانیان لە قەرز و کرێیەکان کردووە تەنیا دوو ڕۆژیان لە بەردەم ماوە  بۆ ئەوەی لەو داشکاندنانە سوودمەند ببن کە پێشتر کراون.