ئەحمەد شەرع: هێزە کوردییەکان دەبنە بەشێک لە وەزارەتی بەرگریی سووریا

ئاڤا نیوز

 

فەرماندەی گشتیی ئیدارەی نوێی سووریا لە چاوپێکەوتنێکی تەلەڤزیۆنیدا باسی لە چەندین پرسی پەیوەست بە کورد، ناوخۆی سووریا، ناوچەیی و نێودەوڵەتیی کرد و ئاماژەشی بەوە کرد کە هێزە کوردییەکان دەبنە بەشێک لە وەزارەتی بەرگریی سووریا.

 

وێنە گەورەکە: لە هەشتی ئەم مانگەوە لە ئۆپراسیۆنێکی سەربازییدا کە ئەحمەد شەرع سەرکردایەتی دەکرد، کۆتاییان بە دەسەڵاتی بەشار ئەسەد هێنا، ئێستا وڵاتەکە لە قۆناغێکی ڕاگوزەردایە، گفتوگۆی نێوان حکومەتی سووریا دەربارەی پرسی دەستوور و مافی گەلی کورد لەو وڵاتە و ئایندەی سووریا بەردەوامە. 

لێدوانی فەرمی: ئەحمەد شەرع، فەرماندەی گشتیی ئیدارەی نوێی سووریا لە چاوپێکەوتنێکی تەلەڤزیۆنی لەگەڵ "ئەلعەرەبییە"ی سعوودی ڕایگەیاند:خۆم بە ئازادکەری سووریا دانانێم، هەموو ئەوانەی قوربانییان داوە کە گەلی سووریایە وڵاتیان ئازاد کرد.

 

دەربارەی پرسی کورد باسی لەوەکرد:-

 

• لە دانوستاندن داین لەگەڵ هەسەدە بۆ چارەسەرکردنی کێشەی باکووری ڕۆژهەڵاتی سووریا، دواتر ئەو هێزانە دەبنە بەشێک لە هێزە چەکدارەکانی حکومەتی سووریا، سووریا دابەش ناکرێت.

• کورد بەشێکى دانەبڕاون لە پێکهاتەکانى دیکەى سووریا و ڕێگە نادەین پەکەکە سووریا بکاتە پێگەیەک بۆ ئەنجامدانی هێرشەکانی.

 

دەربارەی ناوخۆی سووریا باسی لەوەکرد:-

 

• ڕەنگە پرۆسەی نووسینەوەی دەستووری نوێ سووریا نزیکەی سێ ساڵ بخایەنێت.

• بۆ ئەوەی هەڵبژاردنێكی تەندروست ئەنجام بدرێت، پێویستە سەرژمێریی سەرتاسەریی دانیشتووان بکرێت دواتر هەڵبژاردن ئەنجامبدرێت کە ڕێکخستنی هەڵبژاردن ڕەنگە چوار ساڵ بخایەنێت. 

• "کۆنگرەی گفتوگۆی نیشتیمانی" کۆکەرەوەی سەرجەم پێکهاتەکانی کۆمەڵگە دەبێت و لیژنەی تایبەتمەندی دەبێت هەروەها دەنگدانیشی لەسەر دەکرێت.

• هیچ نیگەرانییەک لە نێوخۆی سووریا دا نییە چونکە سوورییەکان پێکەوە دەژین و ئەوانەی تاوانیان ئەنجامداوە سزا دەدرێن.

• سووریا پێویستیی بە ساڵێک هەیە تاوەکو هاووڵاتیان هەست بە گۆڕانکاریی ڕێشەیی لە ڕووی خزمەتگوزارییەوە بکەن.

• خۆپیشاندان مافی هەر هاووڵاتییەکە بۆ دەربڕین لە ڕاو بۆچوونەکانی بێ زیان گەیاندن بە دامەزراوەکان. 

• گرووپە چەکدارەکان لەوانەش دەستەی تەحریرولشام هەڵدەوەشێنرێن و لە کۆنگرەی گفتوگۆی نیشتیمانی ڕادەگەیێنرێت، دەسەڵات بە عەقڵیەتی دەوڵەت بەڕێوەدەبرێت و سووریا نابێتە مایەی ناڕەحەتی هیچ لایەنێک.

 

سەربارەت بە پرسە ناوچەیی و نێودەوڵەتییەکان:

 

• ئازادکردنی سووریا ئاسایشی ناوچەکە و کەنداو بۆ 50 ساڵی دیکە دەستەبەر دەکات.

• هیوادارین ئیدارەی دۆناڵد ترەمپ سزاکانی سەر سووریا هەڵبگرێت.

• هیوادارین ئێران پێداچوونەوە بە دەستێوەردانەکان لە ناوچەکە و سیاسەتی خۆی بکات. 

• نامانەوێت ڕووسیا لە سووریا بچێتە دەرەوە بەشێوەیەک کە گونجاو نەبێت لەگەڵ پەیوەندییەکانی لەگەڵ سووریا، دیمەشق پەیوەندییەکی هاوبەش و ستراتیژی لەگەڵ مۆسکۆ هەیە.