ئەنجوومەنی وەزیران لەسەر سێ پرسی پەیوەست بە مووچە کۆدەبێتەوە

ئاڤا نیوز

 

ئەنجوومەنی وەزیرانی هەرێمی کوردستان دۆخی دارایی ساڵی ڕابردوو و پرسی مووچە تاوتوێ دەکات و لەسەر سێ تەوەری پەیوەست بە مووچە و مووچەخۆران کۆدەبێتەوە، ڕاپۆرتێکیش سەبارەت بە دۆخی دارایی هەرێمی کوردستان لە ساڵی 2024 لە کۆبوونەوەکەدا دەخرێتەڕوو.

 

وێنە گەورەکە: هەرێمی کوردستان بەهۆی بەردەوامی کێشە هەڵپەسێردراوەکانی لەگەڵ عێراق، سەرباری لێکتێگەیشتن و ڕێککەوتنەکان بەدرێژایی ساڵی ڕابردوو لەکاتی خۆیدا و بە تەواوی مووچەی مووچەخۆرانی بەدەستنەگەیشت و بەهۆیەوە هەندێک مانگ دابەشکردنی مووچە دواکەوت و ئێستاش چارەنووسی مووچەی مانگی 12ی ساڵی ڕابردوو نادیارە، ئەنجوومەنی وەزیرانی هەرێمی کوردستانیش یەکەم کۆبوونەوەی خۆی لە ساڵی نوێدا تایبەت دەکات بە پرسی بوودجە و مووچە.

 

لێدوانی فەرمی: پێشەوا هەورامانی، وتەبێژی حکومەتی هەرێمی کوردستان دەربارەی کۆبوونەوەکە ڕایگەیاند "لە کۆبووەنەوەکە لەپاڵ پرسی مووچە، ڕاپۆرتێک لەبارەی دۆخی دارایی ساڵی 2024 دەخرێتە ڕوو، جگە لەوەش بابەتی بایۆمەتری و ناردنی زانیارییە داواکراوەکان بۆ بەغدا و ڕاپۆرتیک لەبارەی بەرەوپێشچوونەکانی پڕۆژەی بە ئەلیکترۆنیکردنی ناوەندی خشتەی موچەخۆرانی هەرێمی کوردستان پێشکەش دەکرێت."

 

ئەوەی پێویستە بیزانیت: بڕیارە سبەی چوارشەممە 08-01-2025 ئەنجوومەنی وەزیرانی هەرێمی کوردستان یەکەم کۆبوونەوەی لە ساڵی نوێ بکات، هەموو تەوەرەکانی کۆبوونەوەکەش تەرخانکراوە بۆ پرسی مووچە و دۆخی فەرمانبەرانی هەرێمی کوردستان.