مەزڵووم عەبدی پێشوازی لە پەیامەکەی سەرۆک بارزانی دەکات

ئاڤا نیوز 

 

نوێنەری سەرۆک بارزانی پەیامێکی تایبەتی لەبارەی یەکڕیزیی کورد لە سووریا گەیاندە مەزڵووم عەبدی، ناوبراو پێشوازی لە پەیامەکە کردووە و دووپاتی کردووەتەوە؛ قۆناغی ئێستا پێویستی بە هەوڵی بەکۆمەڵی هەموو لایەنە کوردستانییەکانە بۆ پاراستنی بەرژەوەندییەکانی گەلی کوردستان. 

 

وێنە گەورەکە: دوای کەوتنی دەسەڵاتی ئەسەد، چارەنووسی کورد لە سووریای نوێدا بووەتە پرسێکی گرنگ، چەند جارێک لایەنە کوردییەکانی ڕۆژئاوای کوردستان خۆیان گفتوگۆیان کردووە و کۆبوونەتەوە بۆ ئەوەی یەکڕیز و یەکگووتاربن.

چیرۆکی سەرەکی:  د. عەبدولحەمید دەربەندی، نوێنەری تایبەتی سەرۆك بارزانی لە ڕۆژئاوای کوردستانە، ئەمڕۆ لە حەسەکە بۆ یەکەمجار لەگەڵ مەزڵووم عەبدی، فەرماندەی گشتیی هەسەدە كۆبووەوە، دواتر سەردانی قامشلۆی کرد و لەگەڵ ئەنەکەسە کۆبووەوە.

زانیاریی بەدەستهاتوو: لە كۆبوونەوەكەدا د.عەبدولحەمید دەربەندی، پەیامی سەرۆك بارزانی گەیاندە مەزڵووم عەبدی، لە پەیامەكەدا باس لە گرنگیی هاوكاریی لایەنە كوردییەكانی ڕۆژئاوای كوردستان کراوە لەو دۆخەی ئێستا هاتووەتە ئاراوە.

لێدوانی فەرمی: مەزڵووم عەبدی، فەرماندەی هەسەدە باسی لە گرنگیی پاراستنی دەستكەوتەكانی كوردان و دروستكردنی دۆخێكی ئارام لە ڕۆژئاوای كوردستان كردووە، ئاماژەی بە ئەوەش دا كە لەم كاتەدا هەوڵی هاوبەشی نێوان پارتە كوردییەكان زۆر گرنگە.