سەرەڕای ئاگربەست ئیسرائیل بەرەیەکی نوێی شەڕ لە غەززە دەکاتەوە

ئاڤا نیوز

هەرچەندە قۆناغی یەکەمی ئاگربەستی غەززە لە ڕۆژی پێنجەمی دایە، بەڵام ئیسرائیل لە کەناری ڕۆژئاوا بەرەیەکی دیکەی شەڕی کردووەتەوە و لەناو کەمپی جنین ئۆپەراسیۆنێکی سەربازی دەستپێکردووە، لە ئەنجامیشدا لانیکەم 10 کەس کوژراون.

چیرۆکی سەرەکی: ئامانجی ئۆپەراسیۆنەکە "پەرژینی پۆڵایین"ـە لە کەمپی جنین بۆ لەناوبردنی ژێرخانی تیرۆر و "تیرۆرستانە"، وەزیری بەرگری وڵاتەکەش جەخت دەکاتەوە کە ڕێگە بە ئێران نادەن "بەرەی تیرۆر" لەناوچەکەدا بونیاد بنێت.

ڕاگەیێنراوی فەرمی: وەزارەتی تەندروستی فەڵەستین بڵاویکردەوە، لە ئەنجامی ئۆپەراسیۆنەکەی ئیسرائیل بۆسەر کەمپی جنین،  10 کەس کوژراون و 40 کەسی دیکەش بریندار بوون، هاوکات کارەبا و خزمەتگوزارییەکانیش لە بەشێک لە شاری جنین و کەمپی ئاوارەکان پچڕاون.

لەلایەکی دیکەوە: فرانشیسکا ئالبانێز، بڕیاردەری دۆسیەکانی مافی مرۆڤی نەتەوە یەکگرتووەکان لە فەڵەستین ڕایگەیاند، ئەگەر ئیسرائیل ڕانەگیرێت لەسەر ئۆپەراسیۆنەکەی، مەترسی گەورە هەیە کە هاوشێوەی غەززە، لە کەناری ڕۆژئاواش کۆمەڵکوژی و تاوانی دژ بە مرۆڤایەتی ئەنجام بدات.