فیلمی كوردی "مرازی دڵ" لە ئیستەنبووڵ نمایش دەكرێت

ئاڤا نیوز

 

فیلمی "مرازی دڵ" نوێترین بەرهەمی دەرهێنەری کورد ئیبراهیم ئافشین حەقییە، چیرۆکی فیلمەکە باس لە دڵداری نێوان کچ و کوڕێک دەکات لە عەفرینی ڕۆژئاوای کوردستان، بڕیارە لەناوەڕاستی ئەم مانگە لە ئیستەنبووڵ نمایش بکرێت.

 لێدوانی فەرمی: بەهلول کوردی، ئەکتەری سەرەکی فیلمی "مرازی دڵ" لە لێدوانێکدا بە ئاڤا نیوزی گوت: لەساڵی 2017 ەوە لە تورکیا پەنابەرم، ئەو فیلمەی دەرمانهێناوە، چەند نمونەیەک لە کلتووری کۆنی کورد نیشان دەدەین، ڕەخنە لە خاڵە نەرێنییەکان دەگرین، جگە لەوەی تایبەتمەندی زمانی کوردیمان پاراستووە.

 زانیاریی زیاتر: فیلمی "مرازی دڵ" بڕیارە بۆ یەکەم جار لە ناوەڕاستی مانگی ئاداری ئەمساڵ لە شاری ئیستەنبووڵ نمایش بکرێت، پاشانیش لە پلاتفۆڕمەکانی سۆشیال میدیا بڵاوبکرێتەوە.

ئەوەی پێویستە بیزانیت: ئەو ئەکتەرانە کە یەکێک لەوان بەهلول کوردییە خەڵکی ڕۆژئاوای کوردستانن، کرێکاری دەکەن، زۆرجار بە داهاتی خۆیان فیلم و کورتە فیلم درووست دەکەن و تائێستا زیاتر لە 100 فیلم و کورتە فیلمیان درووستکردووە.

 بۆچی گرنگە: ئەو کورتە فیلم و فیلمانەی ئەو ئەکتەرانە کاری لەسەر دەکەن بۆ گرنگیدان بە کلتووری کوردی و باس کردنی چیرۆکەکانی ژیانی گەلی کورد گرنگە.