خەریکە قەیرانی ئەربیل لەنێوان ئیسرائیل و حەماس کۆتایی پێدێت

ئاڤا نیوز

بە گوێرەی میدیا ئیسرائیلییەکان، خەریکە قەیرانی ئەربیل یەهود لەنێوان ئیسرائیل و حەماس کۆتایی پێدێت ئەگەری هەیە پێش ڕۆژی شەممە ئازاد بکرێت.

 

وێنە گەورەکە: ئاڵوگۆڕی بارمتە و دەستگیركراوەكان لەچوارچێوەی ڕێككەوتنی ئاگربەستی نێوان حەماس و ئیسرائیل بەردەوامە، بەڵام قەیرانی ئەربیل یەهود خەریکە هەڕەشە لەسەر پرۆسەی ئاڵۆگۆڕەکان و گەڕانەوەی ئاوارەکان بۆ ناوچەکانیان و هەڵوەشانەوەی ڕێککەوتنەکە دەکات.

 

زانیاریی بەدەستهاتوو: کەناڵی "کان" ئیسرائیلی لەسەر زاری سەرچاوەیەکی ئیسرائیلی بڵاویکردووەتەوە "ئەگەری هەیە ئەمڕۆ وەڵامێک لە نێوبژیوانان وەربگرین کە کۆتایی بە ناکۆکی لەسەر (ئەربیل یەهود) بهێنێت".

 

زانیاریی زیاتر: بە گوتەی ئەو سەرچاوەیە "لە ئیسرائیل ئامادەکاری بۆ ئەگەری ئازادکردنی ئەربیل یەهود پێش ڕۆژی شەممە دەکرێت، هەرچەندە قەیرانەکە هێشتا چارەسەر نەکراوە."

 

لەلایەکی دیکە: ماڵپەڕی "ئاکسیۆس"ی ئەمریکی لەسەر زاری دوو بەرپرسی ئیسرائیلی باس لەوە دەکەن پێشکەوتن لە دانوستانەکان بۆ ئازادکردنی ئەربیل یەهود هەیە، بەڵام هێشتا ڕێککەوتن نەکراوە."

 

ئەوەی پێویستە بیزانیت: ئەربیل یەهود کچێکی تەمەن 29 ساڵی جووە، لە 7ـی ئۆکتۆبەردا لەلایەن چەکدارانی بزووتنەوەی حەماس دەستگیرکرا، بەگوێرەی میدیاکانی ئیسرائیل، ئەربیل هاووڵاتییەکی مەدەنییە و لە ماڵەکەی خۆیدا ڕفێندراوە.

 

بۆچوونی لایەنی بەرامبەر: بەڵام چەکدارانی حەماس دەڵێن ئەربیل، سەربازە و مەدەنی نییە، بۆیە ناکەوێتە نێو چوارچێوەی ئازادکردنی هاووڵاتییە سڤیلەکان، بەڵام حکومەتی ئیسرائیل دەڵێت هاووڵاتییەکی مەدەنییە و هیچ پلەیەکی سەربازی نییە و کردوویەتی بە مەرج بۆ ڕێگەدان بە گەڕانەوەی ئاوارەکان.