180 هەزار فۆڕمی دیکەی وەرگرتنی زەوی پەسند دەکرێن

 

ئاڤا نیوز

ناو و فۆڕمی زیاتر لە 180 هەزار فەرمانبەری هەرێمی کوردستان لە ئەنجوومەنی وەزیرانە و دوای پەسەندکردنی دەگەڕێنرێتەوە شارەوانییەکان، ئاڤا بەدواداچوونی کرد و ژمارەی فۆڕمی ئەو فەرمانبەرانەی ئاشکرا کردووە کە بۆ پارێزگا و ئیدارە سەربەخۆکان پەسەند دەکرێت.

چیرۆکی سەرەکی: لە قۆناغی یەکەمی دابەشکردنی زەوی زیاتر لە 10 هەزار پارچە زەوی لە هەولێر، سلێمانی، دهۆک و زاخۆ دابەشکران، ئەم قۆناغە هەڵەبجە، سۆران، گەرمیان و ڕاپەڕینیش دەگرێتەوە، وردبینی زیاتر لە 180 هەزار فۆڕم کراوە و لەم ڕۆژانەش پەسەند دەکرێن، بەڵام چەند پارچە دابەشدەکرێت دەکەوێتە سەر ژمارەی زەوی بەردەست لە شارەوانییەکان.

لێدوانی فەرمی: سەربەست مەولود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی بە ئاڤای ڕاگەیاند، "ئەو فۆڕمانەی پەسەند دەکرێن بەچەند قۆناغێک زەوی وەردەگرن و لە پرۆسەکە بێبەش نابن، ئەگەر ئێستاش وەرینەگرن بەهۆی نەبوونی زەوی لەماوەی داهاتوو پێیان دەدرێت."

ژمارەکان وادەڵێن: ئەو ناوانەی بڕیاری وەرگرتنی زەویان بۆ دەردەچێت بەم شێوەیە پۆلینی سەر پارێزگا و ئیدارە سەربەخۆکانیان دەبن:-

هەولێر: 55 بۆ 60 هەزار فۆڕم

سلێمانی و هەڵەبجە: نزیکەی 45 هەزار فۆڕم

دهۆک: 39 هەزار فۆڕم

ئیدارەی سۆران: 5  بۆ 7 هەزار فۆڕم

ئیدارەی زاخۆ:11 بۆ 13 هەزار فۆڕم

ئیدارەی گەرمیان: 14 بۆ 15 هەزار فۆڕم

ئیدارەی ڕاپەرین: 6 بۆ 9 هەزار فۆڕم