یەکێتی ئەوروپا: خواستەکانی گەلی سووریا گرنگن

 

ئاڤا نیوز

یەکێتیی ئەوروپا پێشوازی لە هەنگاوەکانی ئەحمەد شەرع سەرۆکی قۆناغی ڕاگوزەری سووریا کرد و جەختیان لەوەکردەوە ئەو هەنگاوانە خزمەت بە خواستەکانی گەلی سووریا دەکەن.

چی ڕوودەدات: شاندێکی دیپلۆماسی ئەوروپا لەگەڵ ئەسعەد شەیبانی وەزیری دەرەوەی سووریا لە دیمەشق باسیان لە ڕاگوزەری سیاسی و ئاسایش و هەڵگرتنی سزاکان کردووە، ئەمەش ئاماژەیە بۆ ئەوەی یەکێتی ئەوروپا کاردەکات بۆ بەهێزکردنی ڕۆڵی خۆی لە دیمەشق.

لێدوانی فەرمی: لویس بوینۆ وتەبێژی یەکێتیی ئەوروپا بۆ ڕۆژهەڵاتی ناوەڕاست و ئەفریقا ڕایگەیاند، لێدوانەکانی ئەحمەد شەرع سەبارەت بە قۆناغەکانی ڕاگوزەری سیاسی گرنگن و خزمەت بە خواستەکانی گەلی سووریا دەکەن و ئەوروپا پێشوازی لە لێدوانەکانی دەکات.

باکگراوند: ئەحمەد شەرع سەرۆکی قۆناغی ڕاگوزەری سووریا ڕایگەیاند، قۆناغی ڕاگوزەر بەشێکە لە پڕۆسەیەکی سیاسی کە پێویستی بە بەشداری ڕاستەقینەی ژنان و پیاوانی سووریا هەیە لە ناوخۆ و دەرەوەی وڵات بۆ ئەوەی داهاتوویان بە ئازادی بونیادبنێن، بەبێ ئەوەی دووربخرێنەوە یان پەراوێزبخرێن.