هەولێر و بەغدا ئامادەکاری بۆ هەناردەکردنەوەی نەوتی کوردستان دەکەن

ئاڤا نیوز

وەزیری نەوتی عێراق ئاشکرای کرد دەستیان کردووە بە هەوڵەکانی هەناردەکردنەوەی نەوتی هەرێمی کوردستان لەڕێگەی کۆمپانیای سۆمۆ.

وێنە گەورەکە: ڕۆژی 2ـی ئەم مانگە پەرلەمانی عێراق هەمواری یاسای بودجەی گشتیی عێراقی پەسەند کرد کە پەیوەست بوو بە هەناردەکردنەوەی نەوتی هەرێمی کوردستان، هەردوو حکومەتی عێراق و هەرێمی کوردستان هەماهەنگی دەکەن بۆ دەستپێکردن بەو پرۆسەیە.

لێدوانی فەرمی: حەییان عەبدولغەنی، وەزیری نەوتی عێراق ڕایگەیاند:

•    وەزارەتی نەوت هەوڵەکانی لەگەڵ حکومەتی هەرێم دەستپێکرد بە ناردنی نوسراوێکی فەرمی بۆ گەیاندنی نەوت بەشێوەیەکی یاسایی بۆ کۆمپانیای سۆمۆ.

•    چەندین ڕێکار گیراوەتەبەر لەگەڵ حکومەتی تورکیا بۆ ئامادەکردنی هێڵی بۆڕیی عێراق-تورکیا بۆ هەناردەکردنی نەوت لە ڕێگەی بەندەری جەیهانەوە.

•    نەوتی هەرێمی کوردستان، بەمەرجێک ڕۆژانە 300 هەزار بەرمیل کەمتر نەبێت، ڕادەستی وەزارەتی نەوتی فیدراڵی دەکرێت بۆ ئەوەی لە ڕێگەی بۆری عێراق-تورکیا هەناردە بکرێت، ئەو قەرزانەی لای هەرێمی کوردستانە لە نێوان هەردوو هەولێر و بەغدا ڕێککەوتنیان لەسەر دەکرێت.

 

ئەوەی پێویستە بیزانیت: لە مانگی ئاداری ساڵی 2023 بە بڕیارێکی دادگەی ناوبژیوانی پاریس هەناردەکردنی نەوتی هەرێمی کوردستان لە ڕێگەی بەندەری جەیهانی تورکیاوە ڕاگیرا.