دادگای فیدڕاڵی لەبارەی سکاڵایەکی تایبەت بە مووچەی فەرمانبەرانی کوردستان کۆدەبێتەوە

ئاڤا نیوز

ئەمڕۆ دادگەی فیدڕاڵی سکاڵایەکی سەرۆککۆماری عێراق تاوتوێ دەکات کە تایبەتە بە پابەندکردنی حکومەتی عێراق بە ناردنی مووچەی فەرمانبەرانی هەرێمی کوردستان بەبەردەوامیی و لەکاتی خۆییدا.

چیرۆکی سەرەکی: دوای دوو هەفتە لە کۆبوونەوە، 3ـی ئەم مانگە شاندی هەرێمی کوردستان لە بەغدا ڕایانگەیاند، لەگەڵ بەغدا گەیشتوونەتە چارەسەری یەکجاری لەبارەی کێشەی مووچە و بۆ ساڵی 2025 کێشەی مووچە نامێنێت.

ڕاگەیێنراوی فەرمی: بەگوێرەی خشتەی کۆبوونەوەکانی ئەمڕۆی دادگەی فیدڕاڵی، دادگەکە سکاڵایەکی لەتیف ڕەشید، سەرۆککۆماری عێراق تاوتوێ دەکات کە دژی سەرۆکوەزیران، سەرۆکی پەرلەمان و وەزیری دارایی فیدڕاڵ تۆماریکردووە و تیایدا داوا دەکات فەرمانێکی سالاری بەپەلە دەربکرێت و وەزارەتی دارایی پابەند بکرێت بە خەرجکردنی مووچەی فەرمانبەرانی کوردستان بۆ هەموو مانگەکانی پێشوو و داهاتوو.

لە سکاڵاکەدا داواشکراوە وەزارەتی دارایی عێراق پابەندبکرێت بەوەی هیچ کێشەیەکی هونەریی و کارگێڕی نەکاتە پاساو بۆ دواخستنی ناردنی مووچەی فەرمانبەرانی کوردستان.