پوتن لە ڕێگەی تەلەفۆنەوە پەیوەندی بە ئەحمەد شەرع دەکات

ئاڤا نیوز

ڤلادیمێر پوتن، سەرۆکی ڕووسیا بۆ یەکەمجار پەیوەندی بە ئەحمەد شەرع، سەرۆککۆماری سووریا دەکات، پوتن پشتیووانی وڵاتەکەی بۆ یەکپارچەیی خاکی سووریا ڕاگەیاند و  پەیوەندی قۆناغێکی نوێی نێوان هەردوو وڵات تاووتوێ کرا.

بۆچی گرنگە: ئەمە یەکەم پەیوەندی نێوان ئەو دوو وڵاتەیە، لە دوای ڕووخانی ڕژێمی ئەسەد، جیهان چاوەڕێی کاردانەوەکانی ڕووسیا بوو بەرامبەر بە ئیدارەی نوێی سووریا، لە کاتێکدا بەشار ئەسەدی سەرۆکی هەڵاتووی سووریا لە مۆسکۆ خۆی حەشار داوە. پوتن پەیوەندییەکی نزیکی لەگەڵ ئەسەد دا هەبوو.

ڕاگەیێنراوی فەرمی: کۆشکی کرێملین ڕایگەیاند، پوتن یەکەم پەیوەندی تەلەفۆنی لەگەڵ شەرع ئەنجامدا، پشتیووانی وڵاتەکەی بۆ یەکپارچەیی خاکی سووریا نیشاندا، هیوای سەرکەوتنی بۆ ناوبراو خواست لە بەرامبەر ڕاپەراندنی ئەرکەکانی ئیدارەکەی لە بەرژەوەندی گەلی سووریا. 

لەلایەکی دیکەوە: سەرۆکایەتی کۆماری سووریا لە بڵاوکراوەیەکدا ڕایگەیاندووە، لە میانی پەیوەندییە تەلەفۆنییەکەدا، ئەحمەد شەرع، سەرۆککۆماری سووریا جەختی لە پەیوەندییە ستراتیژییە بەهێزەکانی نێوان هەردوو وڵات کردەوە و جەختی لەوە کردەوە کە سوریا کراوەیە بەڕووی هاوکاریدا تا ئەو کاتەی خزمەت بە بەرژەوەندییەکانی سوورییەکان بکات و بەشداری لە بەهێزکردنی ئاسایش و سەقامگیری بکات.

زانیاریی زیاتر: سەرۆکی ڕووسیا جەختی لە لابردنی گەمارۆ ئابوورییەکانی سەر سووریا کردەوە و بە فەرمی، ئەحمەد شەرع و شەیبانی بۆ مۆسکۆ بانگهێشت کردووە.

هەردوو سەرۆک چەند بابەتێکی هەنووکەیییان تاووتوێ کرد کە پەیوەندییان بە هاوکاریی کردەیی لە بواری بازرگانی، ئابووری، پەروەردە و بوارەکانی دیکەدا هەبوو، بەتایبەتی لە ژێر ڕۆشنایی دانووستانەکانی ئەم دواییەی شاندی ڕووسیا لە دیمەشق.

ئەوەی پێویستە بیزانیت: ئەمە یەکەم پەیوەندی تەلەفۆنی نێوان پوتن و شەرع بوو، بەڵام پێشتر، میخائیل بۆگدانۆڤ، نوێنەری تایبەتی سەرۆکی ڕووسیا بۆ ڕۆژهەڵاتی ناوەڕاست و وڵاتانی ئەفریقا و جێگری وەزیری دەرەوە سەردانی ئیدارەی نوێی سووریا کردبوو.