سەرووی هەزار فەرمانبەری وەزارەتی داد فەرمانی پێدانی زەوییان بۆ  دەرچوو

ئاڤا نیوز

ئاڤا لیستی ناوی ئەو فەرمانبەرانەی دەستكەوتووە كە سەر بە میلاکی وەزارەتی دادن و زەوییان پێ دەدرێت، لە قۆناغی یەکەمی پرۆسەکەش هەزار و 145 فەرمانبەر ئاگادارکراونەتەوە کە سوودمەند دەبن.

چیرۆکی سەرەکی: ئەمڕۆ فەرمانی پێدانی زەوی بە سەرووی هەزار فەرمانبەری وەزارەتی دادی حكومەتی هەرێمی كوردستان دەرچوو كە لەلایەن ئەنجوومەنی شارەوانی ڕەزامەندی لەسەر دراوە و لە ئاییندەیەكی نزیكدا دەست دەكرێت بە ژمارەكردنی كارتی زەوی بۆ ئەو فەرمانبەرانە كە بەگوێرەی كارتی زانیارییان نیشتەجێی پارێزگای هەولێرن.

لێدوانی فەرمی: سەرچاوەیەك لە وەزارەتی  داد بۆ ئاڤا دەڵێت،

- دوای بریاری ئەنجوومەنی وەزیران ژمارە (242) لە27-3-2024، نووسراوی گشتاندنیان بۆ سەرجەم بەڕێوەبەرایەتییە گشتییەكانی سەر بە وەزارەت كردووە تایبەت بە دابەشكردنی زەوی بەسەر فەرمانبەران بەپێی ڕێنمایی ژمارە 2ـی ساڵی 2024.

- ئەمڕۆ ئەنجوومەنی شارەوانی ڕەزامەندیی دا لەسەر تەرخانکردنی زەوی بۆ هەزار و 145 فەرمانبەری وەزارەتی داد لە سنووری پارێزگای هەولێر، پرۆسەکە لە شوێنەکانی دیکەی هەرێمی کوردستانیش بەردەوام دەبێت.

- بە لەبەرچاوگرتنی ساڵانی خزمەت و باری خێزانی و ژمارەی منداڵ و سوودمەند نەبوونیان لە وەرگرتنی زەوی لە ساڵانی ڕابردوو زەوی بەسەر فەرمانبەران دابەش دەکرێت.

زانیاریی زیاتر: خاڵی كۆكراوەی هەر فەرمانبەرێكی سوودمەندبووش لەنێوان 75 خاڵ تاوەكو 20 خاڵ بووە بە لەبەرچاوگرتنی ئەو مەرجانەی كە لەلایەن ئەنجوومەنی وەزیرانی هەرێمی كوردستان دیاریكرابوو.