هەرێمی کوردستان دووەم ڕێکار بۆ ناردنی مووچەی مانگی دوو جێبەجێ دەکات

 

ئاڤا نیوز

 

هەرێمی کوردستان ڕاپۆرتی  خەرجی و داهاتی وەزارەت و فەرمانگەکانی حکومەتی بۆ مانگی یەک تەواو کرد، کە یەکێکە لە ڕێکار و پابەندییەکانی هەرێمی کوردستان بەرامبەر بەغدا بۆ ڕەوانەکردنی مووچەی فەرمانبەران.

 

وێنە گەورەكە: بەپێی ڕێككەوتنی نێوان حكومەتی هەرێمی كوردستان و حكومەتی عێراق سەبارەت بە پرسی مووچەی فەرمانبەرانی هەرێمی كوردستان، پێویستە هەرێمی كوردستان 50%ی داهاتی نانەوتی ناوخۆی بۆ بەغدا بنێرێت، ڕۆژی 12ی ئەم مانگە ئەم خاڵە جێبەجێ كرا، یەكێكی دیكە لە خاڵەكانی ڕێككەوتنەكە بریتییە لە ئامادەكردنی ڕاپۆرتی تەرازووی پێداچوونەوە و ئەمڕۆ هەرێمی کوردستان ئەمەشی جێبەجێ كرد.

 

زانیاریی تایبەت: میزان موراجەعە، واتا تەرازووی پێداچوونەوە، کە خەرجی و داهاتی وەزارەت و فەرمانگەکانی حکومەت دەگرێتەوە بۆ مانگی یەک، تەواو بووە. ئامادەکردنی ئەو ڕاپۆرتە و ناردنی بۆ وەزارەتی دارایی عێراق، لەگەڵ ناردنی سەدا 50ی داهاتی باج و گومرگەکان، دوو ڕێکارن بۆ ناردنی مووچە و پێویستە هەموو مانگێک بکرێن. ئێستا هەردووکیان کراون، واتا حکومەتی هەرێمی کوردستان ئەرکەکانی خۆی بەجێگەیاندووە.

 

ئەوەی پێویستە بیزانیت: تەنیا لیستی مووچە ماوە تەواو بکرێت و بۆ بەغدا بنێردرێت، ئەویش ئێستا لە قۆناغی کۆتاییدایە، هەوڵ بۆ ئەوەیە تاوەکو ئەم پێنجشەممەیە تەواو بکرێت، ئەگەر لە دوو ڕۆژی داهاتوودا تەواو کرا، سەرەتای هەفتەی داهاتوو بۆ بە‌غدا دەنێردرێت.

 

لەلایەکی دیکە: ئەم لەکاتێکدایە ئەمڕۆ لە عێراق دەست بە دابەشکردنی مووچەی مانگی دوو کرا.