ئەحمەد شەرع سەردانی ئوردن دەکات

 

ئاڤا نیوز

بڕیارە ئەم هەفتەیە سەرۆککۆماری سووریا بۆ قۆناغی ڕاگوزەر سەردانی ئوردن بکات و لەگەڵ شای ئوردن تاوتوێی پتەوکردنی پەیوەندییەکانی نێوان هەردوو وڵات بکەن.

وێنە گەورەکە: لەوەتەی پۆستی سەرۆکایەتی بۆ قۆناغی ڕاگوزەر لە سووریا وەرگرتووە، ئەحمەد شەرع سەردانی هەریەک لە سعوودیەو تورکیای کردووە، ئەم سەردانەی بۆ ئوردن دەبێتە سێیەم سەردانی فەرمی بۆ دەرەوەی وڵات و بڕیارە سەرەتای مانگی داهاتووش سەردانی میسر بکات.

زانیاریی بەدەستهاتوو: دوو سەرچاوەی ئوردنی ڕۆژی دووشەممه ڕایانگەیاند کە ئەحمەد شەرع، سەرۆککۆماری سووریا بۆ قۆناغی ڕاگوزەر ئەم هەفتەیە سەردانی شانشینی هاشمیی ئوردن دەکات.

زانیاریی زیاتر: بە وتەی ئەو دوو بەرپرسە کە بە ئاژانسی ڕۆیتەرزیان ڕاگەیاندووە، ڕۆژی چوارشەممە شەرع سەردانی شانشینی ئوردن دەکات و لەگەڵ شا عەبدوڵڵا کۆدەبێتەوە و تاوتوێی پتەوکردنی پەیوەندییەکانی نێوان هەردوو وڵات دەکەن.

ئەمەش بزانە: بە مەبەستی بەشداریکردن لە کۆبوونەوەی خێرای ئەنجوومەنی کۆمکاری وڵاتانی عەرەبی لە میسر کە بڕیارە 2025-03-04 بەڕێوەبچێت، لەلایەن عەبدولفەتاح سیسی، سەرۆککۆماری میسرەوە بانگهێشتی ئەحمەد شەرع بۆ میسر کراوە.