ئەمریکا سەربازی زیاتر بۆ سنووری مەکسیک ڕەوانە دەکات

ئاڤا نیوز

 

ئیدارەی نوێی ئەمریکا بەتووندی ڕووبەڕووی کۆچی نایاسایی بووەتەوە، بۆ ئەم مەبەستەش ئەمریکا ڕەوانەکردنی نزیکەی سێ هەزار سەربازی دیکەی بۆ سنووری مەکسیک ڕاگەیاند کە ئامانج لێی ڕێگریکردنە لە هاتنی کۆچبەران بۆ ناو ئەمریکا.

 

چی ڕوودەدات: پێنتاگۆن نزیکەی 2500 بۆ 3000 سەربازی دیکە  بۆ سنوورەکانی ئەمریکا و مەکسیک ڕەوانە دەکات، ئەمەش لەلایەن پیت هێگسێت، وەزیری بەرگری ئەمریکاوە فەرمانیان پێکراوە، لە چەند هەفتەی داهاتوودا بەفەرمی ئەم سەربازانە لەوێ جێگیر دەکرێن.

 

زانیاریی بەدەستهاتوو:  لە بەیاننامەکەی وەزارەتی بەرگری ئەمریکا قەبارە و ژمارەی سەربازەکان دیاری نەکراوە، بەڵام چەند بەرپرسێکی ئەمریکا قسەیان بۆ میدیاکان کردووە و باس لەوەدەکەن ژمارەی سەربازەکان نزیکەی سێ هەزارە. 

 

بۆچی گرنگە: دۆناڵد ترەمپ، سەرۆکی ئەمریکا، هەر لەگەڵ دەستپێکردنەوەی خولی نوێی  سەرۆکایەتییەکەی هەوڵەکانی خستەگەڕ بۆ بەرەنگاربوونەوەی کۆچی نایاسایی، بۆ ئەم مەبەستەش کۆشكی سپی دەڵێت، بڕیارەکانی ترەمپ کاریگەرییەکی باشی هەبووە لەسەر کەمکردنەوەی بەزاندنی سنوورەکانی ئەمریکا لەلایەن کۆچبەرانەوە.