دووەم گەورەترین فڕۆکەخانە لە سووریا دەکرێتەوە

ئاڤا نیوز

 

دوای داخستنی بۆ ماوەی زیاتر لە سێ مانگ، بڕیارە ڕۆژی سیشەممەی داهاتوو فڕۆکەخانەی حەلەب کە بەدووەم گەورەترین فرۆکەخانە لە سووریا دادەنرێت، بەفەرمی لەلایەن دەسەڵاتی فڕۆکەوانیی سووریاوە بکرێتەوە.

 

بۆچی گرنگە: فڕۆکەخانەی نێودەوڵەتی حەلەب بە ناوەندێکی گەورەی گواستنەوەی ئاسمانی لە سووریا دادەنرێت، پارێزگای حەلەبیش کە بە پایتەختی ئابووری ئەو وڵاتە ناسراوە بە چەندین شوێنی ناوخۆیی و نێودەوڵەتی دەبەستێتەوە.

 

ڕاگەیێنراوی فەرمی: بەپێی میدیاکانی سووریا سێشەممەی داهاتوو 17-3- 2025 فڕۆکەخانەی حەلەب بەفەرمی لەلایەن دەسەڵاتی فڕۆکەوانی سووریاوە دەکرێتەوە و گەشتییاران دەتوانن لەو فڕۆکەخانەیەوە گەشتەکانیان دەستپێبکەنەوە.

 

زانیاریی زیاتر: فڕۆکەخانەی حەلەب لەگەڵ ڕووخانی ڕژێمی بەشار ئەسەد، لە 8-12- 2024، بەهۆی ناسەقامگیری بارودۆخی ئەو کاتەی سووریا گەشتەکانی ڕاگرت و فڕۆکەخانەکەی بەتەواوی بەڕووی گەشتیاران داخست.

 

ئەمەش بزانە: مێژووی درووستکردنی فڕۆکەخانەی حەلەب دەگەڕێتەوە بۆ ساڵی 1950، ڕووبەری وشکانی فڕۆکەخانەکە سێ کیلۆمەتر چوارگۆشەیە و دەکەوێتە ناوچەی نیریب و نزیکەی 10 کیلۆمەتر لە ناوەندی شاری حەلەبەوە دوورە.