عێراق و تورکیا دەربارەی نەوت و غاز کۆدەبنەوە

 

ئاڤا نیوز

وەزیری نەوتی عێراق و وزەی تورکیا  لە بەغدا کۆبوونەوە، پرسی نەوت و غازیان تاوتوێ کرد بێ ئەوەی لە ڕاگەیێنراوی کۆتایی ئاماژە بە پرس و ڕێکارەکانی هەناردەکردنەوەی نەوتی هەرێـمی کوردستان لە ڕێگەی بەندەری جەیهانی تورکیا بکەن.

چیرۆکی سەرەکی: حەییان عەبدولغەنی، وەزیری نەوتی عێراق پێشوازیی لە ئەڵب ئارسلان بایراکتار، وەزیری وزە و سەرچاوە سروشتییەکانی تورکیا و شاندی یاوەری کرد لە بەغدا، بریکاری وەزارەتی نەوتی عێراق بۆ کاروباری دەرهێنان و بەڕێوەبەرە گشتییەکانی کۆمپانیای بەبازاڕکردنی نەوت(سۆمۆ) و کۆمپانیای نەوتی باکوور لە کۆبوونەوەکەدا ئامادەبوون.

ڕاگەیێنراوی فەرمی: وەزارەتی نەوت ڕایگەیاند: لە دیدارەکەدا پەیوەندییە دووقۆڵییەکانی نێوان هەردوو وڵات لە بوارەکانی نەوت و غاز و وزە تاوتوێ کران.

زانیاریی زیاتر: لە ماوەی ڕابردوودا، حەیان عەوبدولغەنی ڕایگەیاندبوو؛ بەم نزیکانە هەناردەکردنەوەی نەوتی هەرێمی کوردستان دەستپێدەکاتەوە، هاوکات تورکیاش ئامادەیی خۆی بۆ وەرگرتنی نەوتی هەرێـمی کوردستان دەربڕیوە.