ترەمپ و زێلێنسکی یەک کاتژمێر بە تەلەفۆن قسە دەکەن

ئاڤا نیوز

دۆناڵد ترەمپ و ڤۆلۆدیمیر زێلێنسکی بۆ یەکەمجار لەدوای شەڕەقسەکەی کۆشکی سپی بە تەلەفۆن بۆ ماوەی یەک کاتژمێر قسە دەکەن.

وێنە گەورەکە: دۆناڵد ترەمپی سەرۆکی ئەمریکا بەردەوامە لەسەر جێبەجێکردنی بەڵێنەکانی بانگەشەی هەڵبژاردن، دەیەوێت شەڕ لە نێوان ڕووسیا و ئۆکراینا ڕابگرێت کە چەندیجار بەڵێنی داوە و جەختی کردووەتەوە ئەو کارە تەنیا بەو دەکرێت.

چیرۆکی سەرەکی: دۆناڵد ترەم لە تۆڕی کۆمەڵایەتی ترووس سۆشیاڵ بڵاوی کردەوە، ئەمڕۆ تەلەفۆنی بۆ ڤۆلۆدیمیر زێلێنسکی، سەرۆکی ئۆکراینا کردووە و یەک کاتژمێر قسەیان کردووە. باسی پڕۆژە پێشنیازی ئەمریکایان کردووە بۆ ڕاگرتنی شەڕ و ڕاگەیاندنی ئاگربەست لە نێوان ڕووسیا و ئۆکراینا.

لێدوانی فەرمی: ترەمپ دەڵێت خۆی تەلەفۆنی بۆ زێلێنسکی کردووە و تەلەفۆنەکەش بە"زۆر باش" وەسف دەکات. بەپێی لێدوانەکەی ترەمپ کە دەڵێت قسەکردنەکەیان زۆر باش بووە، ئەوەی لێ دەخوێنرێتەوە زێلێنسکیش  هاوشێوەی پووتین بە ئاگربەست ڕازی بووبێت یان نەرم بووبێت.

باکگراوند: ترەمپ دوێنێ لەگەڵ ڤلادیمیر پووتین، سەرۆکی ڕووسیا بە تەلەفۆن قسەی کرد، دواتر ڕایگەیاند پووتینی بە ئاگربەستی سنووردار بۆ ماوەی 30 ڕۆژ ڕازی کردووە.