سێ پڕۆژە لە 'چالاکیی کاتژمێری زەوی' لە هەڵەبجە ڕادەگەیێندرێن

ئاڤا نیوز

 

سێ پرۆژە لە "چالاکیی کاتژمێری زەوی" ڕادەگەیێنرێن، کە یەکێکیان چاندنی پێنج هەزار دارە تا ساڵی 2030. 

 

وێنە گەورەکە: شەوی 22-3-2025، چالاکیی کاتژمێری زەوی لە 118 وڵاتی جیهان بەڕێوەچوو، لە چالاکییەکەدا بۆ ماوەی کاتژمێرێک گڵۆپ و ڕووناککەرەوەکان وەک ڕێزگرتن لە ژینگە کوژێنرانەوە، هاوکات باس لە کێشە ژینگەییەکان و هەوڵەکان بۆ باشترکردنیان کرا.

 

لێدوانی فەرمی: ئامانج عومەر، سەرپەرشتیاری چالاکیی کاتژمێری زەوی لە هەرێمی کوردستان بە ئاڤا میدیای ڕاگەیاند: چالاکیی کاتژمێری زەوی لەنێو مۆنیۆمێنتی هەڵەبجە بەڕێوەچوو و  ئەو بۆمبەی شارەکەی پێ بۆردوومان کرا، کردمان بە سەکۆی ڕێزلێنان.

 

زانیاریی زیاتر: سێ پڕۆژەی ستراتیژی لە چالاکیی کاتژمێری زەوی ڕاگەیێنران کە بریتین لە: هەڵمەتێکی چاندنی دار کە تاوەکو ساڵی 2030، دەبێت پێنج هەزار دار وەک ڕەمزی پێنج هەزار شەهید بچێنرێن، هەر کەسێک لە دەرەوەی کوردستانیش بیەوێت لە هەڵەبجە دارێک بچێنێت، شوێنی بۆ دیاری دەکرێت و بڕوانامەی پێ دەدرێت، بڕوانامەکە دەرخەری ئەوە دەبێت کە لە هەڵەبجە خاوەی دارێکە.

 

ئەوەی پێویستە بیزانیت: یەکێکی دیکە لە پرۆژەکان پڕۆژەی دروستکردنی ڕێرەوی پاسکیل و پاسی کارەباییە لەناو هەڵەبجە، بۆ ئەوەی بکرێت بە شارێکی ژینگەیی.

 

لەلایەکی دیکە: سێیەم پرۆژە دابینکردنی پێنج هەزار گڵۆپە کە بە وزەی خۆر کار دەکەن، ئەمە وەکو ڕەمزێکە بۆ پێنج هەزار شەهید، هەروەها ئەم پڕۆژەیە دەتوانێت ببێتە بەشێک لە پرۆژەی ڕووناکی لەناو هەڵەبجە.