ڕوونکردنەوەیەکی نوێ لە وەزارەتی ئەوقاف لەبارەی جەژن

ئاڤا نیوز

 

گوتەبێژی وەزارەتی ئەوقاف و کاروباری ئایینی هەرێمی کوردستان ڕوونکردنەوە دەربارەی ئەو سنوورانە دەدات کە بڕیاری دیاریکردنی جەژن دەیانگرێتەوە، کەرکووک و ناوچە کوردستانییەکانی دەرەوەی ئیدارەی هەرێمی کوردستان ناگرێتەوە.

وێنە گەورەکە: سوننەکانی عێراق بەسەر دوو بەرە دابەش بوون، ئەنجوومەنی باڵای فەتوای عێراق کە سوننەن سبەیان کردە جەژن، بەڵام دیوانی وەقفی سوننەی نەیکرد بە جەژن، ئەمە لەکاتێکدایە هەرێمی کوردستان سبەی کردووەتە جەژن، کوردانی دانیشتووی کەرکووک و ناوچە کوردستانییەکانی دەرەوەی ئیدارەی هەرێمی کوردستان ڕوون نییە لایان سبەی بەڕۆژوو بن یان بیکەن بە جەژن.

لێدوانی فەرمی: نەبەز ئیسماعیل، گوتەبێژی وەزەتی ئەوقافی هەرێمی کوردستان بە ئاڤای گوت: "ئەو ناوچانەی لەژێر دەسەڵاتی حکومەتی هەرێمی کوردستانن بڕیاری وەزارەتی ئەوقاف دەیانگرێتەوە بە هاووڵاتیانی بەڕەگەز عەرەبیش کە نیشتەجێی هەرێمی کوردستانن، بەڵام سنووری ناوچەکانی دەرەوەی ئیدارەی هەرێمی کوردستان ناگرێتەوە."

زانیاریی زیاتر: بەگوێرەی ڕوونکردنەوەکەی وەزارەتی ئەوقاف، سبەی یەکشەممە بۆ کوردانی دانیشتووی پارێزگاکانی کەرکووک، نەینەوا، سەڵاحەددین و پارێزگاکانی دیکەی عێراق، تەواوکەری ڕەمەزانە و جەژن نییە.