دۆسیەی نەوتی کەرکووک بۆ ماوەی 25 ساڵ دەدرێتە کۆمپانیای BP

ئاڤا نیوز

بریکاری وەزارەتی نەوتی عێراق ڕایگەیاند، ڕێککەوتنی حکومەتی فیدڕاڵ و کۆمپانیای بریتیش پیترۆلیۆم (BP) بۆ پەرەپێدانی هەر چوار کێڵگە نەوتییەکەی کەرکووک، بۆ ماوەی 25 ساڵە و دەکرێت پێنج ساڵی دیکەش درێژ بکرێتەوە، جەختیش دەکاتەوە کە ڕێککەوتنەکە هەزاران هەلیکار دەڕەخسێنێت و 85% هەلیکارەکانیش بۆ کارمەندی ناوخۆ دەبێت.

چیرۆکی سەرەکی: 26ی ئەم مانگە و بە چاودێریی سەرۆکوەزیرانی عێراق، ڕێککەوتنی وەزارەتی نەوت و کۆمپانیای بریتیش پیترۆلیۆم (BP)ـی بەریتانی بۆ پەرەپێدانی کێڵگە نەوتییەکانی کەرکووک واژۆکرا، بەگوێرەی ڕێککەوتنەکەش هەناردەی نەوتی کەرکووک بۆ 420 هەزار بەرمیل بەرزدەکرێتەوە.

لێدوانی فەرمی: باسم محەممەد خوزەیر، بریکاری وەزارەتی نەوتی عێراق بۆ کاروباری دەرهێنان بە ئاژانسی هەواڵی فەرمی (واع)ـی ڕاگەیاند، ڕێککەوتنەکەیان لەگەڵ BP بۆ نۆژەنکردنەوەی کێڵگە نەوتییەکانی کەرکووکە  بۆ ماوەی 25 ساڵ و دەکرێت بۆ پێنج ساڵی دیکەش درێژ بکرێتەوە.

- ڕێککەوتنەکە دوای چەند مانگێک لە دانوستان واژۆکراوە و دەستکەوتێکی گرنگە.

- ئێستا بەرهەمهێنانی نەوت لە کێڵگەکانی کەرکووک ڕۆژانە 308 هەزار بەرمیلە، بەگوێرەی ڕێککەوتنەکەش ئاستی بەرهەمهێنانی نەوت دەگەیێنرێتە 420 هەزار بەرمیل و ئەم ئاستەش بۆ هەشت ساڵ بەردەوام دەبێت.

- ئاستی بەرهەمهێنانی غاز ڕۆژانە دەگەیێنرێتە 400 ملیۆن پێ سێجا و بۆ ماوەی 16 ساڵ بەردەوام دەبێت، بی پی نۆژەنکردنەوە و فراوانکردنی کۆگاکانی کۆمپانیای غازی باکوور لە ئەستۆ دەگرێت.

ڕێککەوتنەکە گەڕانیش بەدوای کێڵگەی نەوتی نوێ لە خۆدەگرێت و ئەم بابەتەش دەکەوێتە سەر دەرئەنجامی گفتوگۆکان کە لە داهاتوودا ئەنجام دەدرێن.

- ڕێککەوتنەکە هەزاران هەلیکار بۆ دانیشتووانی نزیک لە پڕۆژەکە دابین دەکات و لە پاڵ ڕاهێنانیش بە کارمەندانی ناوخۆ، 85% هەلیکارەکان کە لەم ڕێککەوتنەوە دروست دەبن، بۆ هاووڵاتیانی عێراقی تەرخان دەکرێن.