ئەنجوومەنی ئابووریی عەرەبی لە چوارچێوەی ئامادەکاریی بۆ لووتکەی بەغدا کۆدەبێتەوە

ئاڤا نیوز

 

ئەمڕۆ دووشەممە ئەنجوومەنی ئابووریی و کۆمەڵایەتی عەرەبی لە قاهیرەی پایتەختی میسر کۆدەبێتەوە و ئامادەکارییەکان بۆ لووتکەی عەرەبیی و لووتکەی گەشەپێدانی کۆمەڵایەتی و ئابووری عەرەبی تاوتوێ دەکات کە بڕیارە ناوەڕاستی مانگی داهاتوو بەڕێوەبچن.

  
ئەوەی پێویستە بیزانیت: 17ی ئایاری ئەمساڵ، بەغدا میوانداریی باڵاترین لووتکەی سیاسی ساڵانەی ڕۆژهەڵاتی ناوەڕاست و باکووری ئەفریقا دەکات، کە تیایدا پادشا و سەرۆکی 22 دەوڵەتی عەرەبی کۆدەبنەوە و برەودان بە هەماهەنگیی لەسەرجەم بوارەکان، چارەسەری ئاستەنگییەکان و چۆنییەتی سوود وەرگرتن لە دەرفەتەکان بۆ نزیکەی نیو ملیار مرۆڤ کە لە وڵاتەکانیاندا دەژین، تاوتوێ دەکەن.

 

لێدوانی فەرمی: هەیفا ئەبو غەزالە، یاریدەدەری ئەمینداری گشتیی کۆمکاری عەرەبی ڕایگەیاند، لە کۆبوونەوەکەی ئەمڕۆدا کە ئەسیر غەریری، وەزیری بازرگانی عێراقیش تیایدا بەشدار دەبێت، گفتوگۆ لەسەر ئاسایشی خۆراک، سوود وەرگرتن لە وزەی خۆر و دۆخی ئاوارەکانی فەڵەستین دەکرێت، هەروەها دیارترین خواستە کۆمەڵایەتییەکانی مرۆڤ لە وڵاتانی عەرەبییش تاوتوێ دەکرێن.

 

بۆچی گرنگە: وەزارەتی دەرەوەی عێراق دەڵێت، لووتکەی عەرەبی پێگەی عێراق و ڕۆڵی کارای لە گۆڕەپانی نێودەوڵەتیدا بەهێزتر دەکات، جەختیش دەکاتەوە کە ئامادەکارییەکان بۆ لووتکەکە بەردەوامن.