ئێران: دانوستانی ڕاستەقینە و دادپەروەرانەمان لە ئەمریکا دەوێت

ئاڤا نیوز

هەوڵەکان بۆ دانوستانی ئەمریکا و ئێران بۆ ڕێککەوتن بەردەوامن، سبەی شەممە شاندی هەردوولا لە عومان کۆدەبنەوە، ئێران داواکارە دانوستانێکی ڕاستەقینە بکرێت.

وێنە گەورەکە: بڕیارە ڕۆژی شەممە ئێران و ئەمریکا بە ئامانجی گەیشتن بە ڕێککەوتن لەسەر بەرنامە ئەتۆمییەکەی تاران دانوستانەکانیان دەستپێبکات، ڕاوێژکارێکی ڕێبەری باڵای ئێرانیش دەڵێت، دانوستانی ڕاستەقینە و دادپەروەرانەیان لە ئەمریکا دەوێت.

لێدوانی فەرمی: عەلی شەمخانی ڕاوێژکاری ڕێبەری باڵای ئێران ڕایگەیاند، دوور لە نمایش و تەنیا قسەکردن لەبەردەم کامێراکان، تاران ڕێککەوتنێکی ڕاستەقینە و دادپەروەرانەی دەوێت.

عەباس عێراقچی، وەزیری دەرەوەی ئێران بە دەسەڵاتی تەواوەوە بۆ دانوستانی ناڕاستەوخۆ لەگەڵ ئەمریکا دەچێتە عومان و ئەگەر واشنتن نیازپاکی نیشان بدات، ئەوا گەیشتن بە قۆناغی داهاتوو ئاسان دەبێت.

باکگراوند: مانگی ڕابردوو دۆناڵد ترەمپ، سەرۆکی ئەمریکا لە نامەیەکدا بۆ عەلی خامنەیی ڕێبەری باڵای ئێران داوای کردبوو دانوستان بکرێت، بەڵام هۆشدارییشدا ئەگەر ئێران ڕەتیبکاتەوە، هەنگاوی سەربازی بەرامبەر ئەو وڵاتە دەگرنەبەر.