وەزیری نەوتی ئێران بە سەردانێک گەیشتە عێراق

ئاڤا نیوز

 

وەزیری نەوتی ئێران بە سەردانێکی فەرمی گەیشتە بەغدای پایتەختی عێراق و بڕیارە لەمیانی سەردانەکەی یاداشتنامەیەکی لێکتێگەیشتن لە بواری وزە لەگەڵ لایەنی عێراقی واژۆ بکات.

 

وێنە گەورەکە: دوای ئەوەی ئەمریکا کۆتایی بە بڕیاری لێخۆشبوونی کڕینی کارەبا و غازی ئێرانی لەلایەن عێراقەوە هێنا، کە پێشتر وەک هاوکاری و ئاسانکارییەک بۆ عێراق دەریکردبوو تاوەکو بتوانێت لەو ڕێگەیەوە پێداویستییەکانی لە کارەبای پێ دابین بکات، پێدەچێت ئەمساڵ بە دیاریکراویش لە وەرزی گەرمادا عێراق ڕووبەڕووی کەمیی کارەبا ببێتەوە.

 

لێدوانی فەرمی: موحسین پاک نەژاد، وەزیری نەوتی ئێران پێشتر بە ئاژانسی فەرمی ئێران "ئیرنا"ی ڕایگەیاندبوو، لە چەند ڕۆژی داهاتوودا وەزیری نەوتی ئێران لەسەر بانگهێشتی هاوتا عێراقییەکەی سەردانی عێراق دەکات.

 

لەلایەکی دیکەوە: موحسین پاک نەژاد ڕایگەیاند: پەیوەندیی و کارلێکێکی باشیان لەگەڵ عێراق لە بوارە جیاجیاکاندا هەیە و ئەم هاوکارییە بەتایبەتی لەبواری پیشەسازی نەوت و جێبەجێکردنی پرۆژەکانی نەوتی نێوان هەردوو وڵاتدا هەیە.

 

ئەوەی پێشبینی دەكرێت: بە گوتەی موحسین پاک نەژاد، لەمیانەی سەردانەکەیدا بۆ عێراق یاداشتنامەی لێکتێگەیشتن لەبواری وزەدا واژۆ دەکرێت.