ڕاگەیێنراوی هاوبەشی پارتی و یەکێتی: هەنگاوی ئەرێنی و بەرەوپێشچوونی باش هەبوو

ئاڤا نیوز

 

هەردوو شاندی دانووستاندنکاری پارتی و یەکێتی لە پیرمام لەبارەی پێکهێنانی کابینەی نوێی حکومەتی هەرێمی کوردستان و دابەشکردنی پۆستەکان کۆبوونەوە، بەگوێرەی ڕاگەیێنراوی هاوبەشی هەردوو حیزبیش، کۆبوونەوەکان لە ڕۆژانی داهاتوو بەردەوامیان دەبێت.

 

وێنە گەورەکە: پارتی و یەكێتی وەک براوەی یەکەم و دووەمی هەڵبژاردن زنجیرەیەک کۆبوونەوەیان لەسەر ئاستی باڵا کردووە، بەمەبەستی ڕێککەوتن لەسەر پێکهێنانی کابینەی دەیەمی حکومەتی هەرێمی کوردستان و شێوازی ئیدارەدانەکەی، لە پاڵ ئەوانەشدا دابەشکردنی پۆستەکان  لە نێوان خۆیاندا.

 

ڕاگەیێنراوی فەرمی: لە ڕاگەیێنراوە هاوبەشەکەی هەردوو حیزبدا هاتووە: کۆبوونەوەکە لە کەشێکی ئەرێنی و دۆستانەدا بەڕێوەچوو، گفتوگۆ لەبارەی هەنگاوەکانی کابینەی نوێی حکومەت کرا و،  هەنگاوی ئیجابی و بەرەوپێشچوونی باش هەبو و لە ڕۆژانی داهاتوو کۆبوونەوەکان بەردەوام دەبن.

 

ئەمەش بزانە: شاندی پارتی پێکهاتبوون لە هۆشیار زێباری، دڵشاد شەهاب، پشتیووان سادق و ئومێد سەباح، شاندی یەکێتییش لە قوباد تاڵەبانی، دەرباز کۆسرەت، ڕێواز فایەق، شاڵاو شێخ سەڵاح، نزار ئامێدی و ئامانج ڕەحیم پێکهاتبوون.