کۆنگرەی نیشتیمانیی کورد لە سووریا دوادەخرێت

ئاڤا نیوز

بەمەبەستی گەرەنتی بەشداریکردنی هەموو لایەنە سیاسییەکان، کۆنگرەی نیشتیمانیی کورد لە سووریا کە بڕیاربوو سبەی هەینیی 18ـی نیسان لە ڕۆژئاوای کوردستان بەڕێوەبچێت، بۆ کاتێکی دیکە دواخرا.

چیرۆکی سەرەکی: بڕیارە لە کۆنگرەی نیشتیمانیی کورد لە سووریا داواکارییەکانی کورد لە دەسەڵاتی نوێی دیمەشق و دەستووری داهاتووی وڵاتەکەدا دیاریبکرێن، هاوکات بڕیاریشە دوای کۆنگرە لیژنەیەکی یەکگرتوو بۆ دانوستان بچێتە دیمەشق.

زانیاریی بەدەستهاتوو: سەرچاوەیەک لە لیژنەی ئامادەکاری کۆنگرەکە بە میدیاکانی ڕۆژئاوای کوردستانی ڕاگەیاند، هۆکاری دواخستنی کۆنگرەی نیشتیمانیی کورد پەیوەندی بە بەشداریی هەندێک لایەنەوە هەبوو، بۆیەش هەوڵەکان بۆ بەستنی کۆنگرەکە لە زووترین کاتدا بەردەوام دەبن ئەویش بەجۆرێک دەبن کە گەرەنتی بەشداریی فراوان و کارای هەموو لایەنەکان بکات.

ئەمەش بزانە: پارتی یەکێتی دیموکرات (پەیەدە) و ئەنجوومەنی نیشتیمانی کورد (ئەنەکەسە) دوو لایەنی سیاسی سەرەکی ڕۆژئاوای کوردستانن، ئەنەکەسە تێبینی لەسەر ناو و چۆنییەتی ئامادەکارییەکانی تایبەت بە کۆنگرەکە هەبوو و بەوهۆیەش بڕیاری بەشداریکردنی نەدابوو، ئەوەش بە هۆکارێک بۆ دواخستنی کۆنگرەکە دادەنرێت.