هاوپەیمانان جەخت لە جێبەجێكردنی یاداشتی لێكتێگەیشتنی نێوان وەزارەتی پێشمەرگە و پێنتاگۆن دەكەنەوە

ئاڤا نیوز

فەرماندەی گشتیی هێزەكانی هاوپەیمانان لە هەرێمی كوردستان دووپات لە گرنگی جێبەجێكردنی خاڵەكانی یاداشتی لێكتێگەیشتنی نێوان وەزارەتی پێشمەرگە و وەزارەتی بەرگریی ئەمریكا دەكاتەوە.

چیرۆكی سەرەكی: لەمیانی دیداری نێوان عیسا عوزێر، سەرۆكی ئەركانی وەزارەتی پێشمەرگە و کۆڵۆنێڵ ڕاب براندستێتەر، فەرماندەی هێزەکانی هاوپەیمانان لە هەرێمی کوردستان، پێشخستنی پرسی چاکسازی لە وەزارەتی پێشمەرگە و یاداشتنامەی لێکتێگەیشتنی نێوان وەزارەتی پێشمەرگە و پێنتاگۆن خرانه‌ بەر باس.

لێدوانی فەرمییەکان:

 فەرماندەی هێزەکانی هاوپەیمانان لە هەرێمی کوردستان ڕایگەیاند: ئەمریكا و هاوپەیمانان بەگرنگیيەوە لە جێبەجێكردنی خاڵەكانی یاداشتنامەی لێكتێگەیشتنی نێوان پێنتاگۆن و وەزارەتی پێشمەرگە دەڕوانن و ڕژدن لەسەر جێبەجێكردنی خاڵەکانی.

عیسا عوزێر، سەرۆکی ئەرکانی وەزارەتی پێشمەرگەش، پابەندی وەزارەتی پێشمەرگەی بۆ ئەنجامدانی چاكسازی و ڕیفۆرمی زیاتر دووپاتكردەوە، بەئامانجی پرۆفێشناڵكردنی هێزەكانی پێشمەرگە.

باکگراوند: ڕۆژی 21ـی ئەیلوولی 2022، وەزارەتی بەرگریی ئەمریكا و وەزارەتی پێشمەرگە یاداشتنامەی لێكتێگەیشتنیان واژۆكرد، تێیدا ئەمریكا دووپات لە پشتیوانیكردنی هێزەكانی پێشمەرگە دەكاتەوە، لەبەرامبەردا یاداشتنامەكە دەستنیشانی ئەو بەرەوپێشچوونانە دەكات كە لەبواری چاكسازیی بنەڕەتیی دامەزراوەكاندا بەدیهاتوون، هاوكات وەزارەتی پێشمەرگە پابەند دەكات بۆ ئەنجامدانی چاكسازیی زیاتر لەپێناو زیاتر پرۆفێشناڵکردنی هێزەکانی.