کۆمیسیۆن تیمەکان نوێکردنەوەی کارتی بایۆمەتریی دەنگدەران دوو هێندە زیاد دەکات

ئاڤا نیوز

 

بە ئامانجی خێراترکردنی پرۆسەی نوێکردنەوەی تۆماری دەنگدەران، کۆمیسیۆنی هەڵبژاردنەکانی عێراق تیمە گەڕۆکەکانی لە ناوەندەکانی نوێکردنەوەی کارتی بایۆمەتریی دەنگدەران بۆ دوو هێندە زیاد دەکات.

 

وێنە گەورەکە: کۆمیسیۆنی باڵای سەربەخۆی هەڵبژاردنەکانی عێراق بەردەوامە لە ئامادەکارییەکانی بۆ بەڕێوەبردنی هەڵبژاردنی خولی شەشەمی پەرلەمانی عێراق کە بڕیارە ڕۆژی 11-11-2025 بەڕێوەبچێت.

 

لێدوانی فەرمی: وەلید خالید عەباس، بەڕێوەبەری فەرمانگەی پرۆسەکان و تەکەنەلۆژیای زانیاری بە ڕۆژنامەی "سەباح"ی ڕاگەیاند: کۆمیسیۆن پێشتر یەک یان دوو تیمی گەڕۆکی بۆ تۆمارکردنی دەنگدەران لە هەر هەزار و 79 ناوەندی تۆمارکردندا دانابوو، بەڵام لە ماوەی نوێکردنەوەی تۆماری دەنگدەراندا ئەم ژمارەیەی دوو هێندە زیادکرد.

 

گۆشەیەکی دیکەی دیمەنەکە: کارەکانی کۆمیسیۆن لە نوێکردنەوەی کارتی دەنگدەران لە بەیانییەوە تا درەنگانی شەو، لە کۆتایی هەفتە و پشووی فەرمیدا بەردەوامە، هاوکات کاتی دەوامکردنی کارمەندان لە کاتژمێر سێی پاشنیوەڕۆ بۆ کاتژمێر پێنجی پاشنیوەڕۆ درێژکردووەتەوە.

 

زانیاریی زیاتر: لە 25ی ئادار، ئەنجوومەنی کۆمیسیارانی کۆمیسیۆنی هەڵبژاردنەکان پرۆسەی نوێکردنەوەی تۆماری بایۆمەتری لە هەزار و 79 ناوەندی تۆمارکردن لە عێراق و هەرێمی کوردستان دەستپێکرد و بۆ ماوەی مانگێک بەردەوام دەبێت.