عێراقچی: ئەگەر نیازپاکی لە دانوستاندنەکان هەبێت ئەنجامی ئەرێنی بەدوایدا دێت

ئاڤا نیوز

 

عەباس عێراقچی، وەزیری دەرەوەی ئێران لەبارەی دانوستاندنەکانی وڵاتەکەی لەگەڵ واشنتن دەڵێت، ئەگەر هەیە ئەنجامی ئەرێنی لە دانوستاندنەکان بەدەستبهێنرێت.

 

وێنە گەورەکە: دوای ئەوەی ڕۆژی شەممە ڕێککەوتی 19ـی 4ـی 2025، دووەم گەڕی دانوستاندنەکانی نێوان ئەمریکا و ئێران لە ڕۆمای پایتەختی ئیتاڵیا بەڕێوەچوو، بەپێی وتەی هەردوولایەنی ئەمریکی و ئێرانی دانوستاندنەکەیان بە ئەرێنی وەسف کرد.

 

لێدوانی فەرمی: عەباس عێراقچی، وەزیری دەرەوەی ئێران ڕۆژی یەکشەممە بە ڕاپۆرتی ئاژانسی هەواڵی مێهری لە ئێران ڕایگەیاند: ئەگەر ڕاستگۆیی و نیازپاکی لە دانوستاندنە ناڕاستەوخۆکان لەگەڵ ئەمریکا بەردەوام بێت، دەتوانرێت ئەنجامی ئەرێنی بەدی بهێنرێت.

 

لەلایەکی دیکە: ئیسماعیل بەقائی، وتەبێژی وەزارەتی دەرەوەی ئێران ڕایگەیاند، لە کاتێکدا جیهان ڕووبەڕووی ئاڵنگاری و هەڕەشەی گەورە بووەتەوە بۆ سەر سەروەری یاسا و بەها مرۆییە هاوبەشەکان، ئێمە پابەند دەبین بە گفتوگۆ و دیپلۆماسی، وەک ئامرازێک بۆ چارەسەرکردنی کێشەکان.

 

ئەوەی پێویستە بیزانیت: بڕیارە ڕۆژی چوارشەممە 23-4-2025، شاندە تەکنیکییەکانی  ئەمریکا و ئێران جارێکی دیکە لە عومان کۆببنەوە  و دواتر شاندە دیپلۆماسییەکان کە پێکدێن لە عەباس عێراقچی و ستیف ویتیکۆف، ڕۆژی شەممەی داهاتوو هەر لە هەمان وڵات دانوستاندن بکەنەوە.