یەکەم حاڵەتی چاکبوونەوەی تای خوێنبەربوون لە کەرکووک ڕاگەیێنرا

ئاڤا نیوز

تەندروستیی کەرکووک یەکەم حاڵەتی چاکبوونەوەی یەکێک لە تووشبووانی تای خوێنبەربوونی لە پارێزگاکە ڕاگەیاند و ئێستا تەنیا یەک تووشبوو ماوە و ئەویش لەژێر چاودێری پزیشکییە.

 

ئەوەی پێویستە بیزانیت: لە پارێزگای کەرکووک تاوەکو ئێستا چوار حاڵەتی تووشبوون بە تای خوێنبەربوون تۆمارکراوە، دوو لەوانە گیانیان لەدەستداوە کە یەکێکیان کارمەندی تەندروستیی کەرکووک بوو، دوو تووشبووش لە نەخۆشخانە لەژێر چاودێری پزیشکیدابوون.

 

وێنە گەورەکە: تای خوێنبەربوون نەخۆشییەکی ڤایرۆسی مەترسیدارە، لە کۆتایی حەفتاکانی سەدەی ڕابردووەوە بڵاوبووەتەوە، لەلایەن ئاژەڵی توشبوو یان گۆشتەکەیەوە دەگوازرێتەوە، هاوکات لەلایەن گەنەوە دەگوازرێتەوە و تووشی مانگا و مەڕ و ئاژەڵەکانی دیکەش دەبێت.

 

ڕاگەیێنراوی فەرمی: بەگوێرەی ڕاگەیێنراوی بەڕێوەبەرایەتی گشتیی تەندروستیی کەرکووک، سەرلەبەیانی ئەمڕۆ دووشەممە 2025-4-21، یەکەم تووشبووی تای خوێنبەربوون کە لەژێر چاودێری وردی تیمە پزیشکییە تایبەتمەندەکان چارەسەری پێویستی وەرگرتووە نەخۆشخانەی جێهێشت.

 

لێدوانی فەرمی: دکتۆر ئەرجان محەممەد ڕەشید، بەڕێوەبەری گشتی تەندروستیی کەرکووک، جەختی لەوە کردەوە کە ستافی چاودێری تەندروستی بە پەرۆشەوە کاریان کردووە بۆ دڵنیابوون لەوەی نەخۆشەکە باشترین چارەسەری وەرگرتووە، ئەمەش بەشداری کردووە لە باشتربوونی باری نەخۆشەکە و دواتر چاکبوونەوەی.