عێراق دڵنیایی لە "پاراستنی ژیانی شەرع لە لوتکەی عەرەبی" دەدات

ئاڤا نیوز

 

ڕاپۆرتێکی فەرەنسی دوو ئامانجی سەردانی شاندی عێراق بۆ دیمەشق ئاشکرا دەکات و دەڵێت، بەغدا نەخشەڕێگای پلانی ئەمنیی خۆی بۆ پاراستنی ژیانی سەرۆکی سووریا لەکاتی بەشداریکردنی لە لوتکەی عەرەبی پێشکەش کردووە، لە سەردانەکەشدا ڕێککەوتن کراوە لەسەر پاراستنی شوێنە پیرۆزەکانی شیعە لە سووریا و بەهێزکردنی ئاسایشی سنوورەکان.

 

چیرۆکی سەرەکی: 17ی مانگی داهاتوو بەغدا میوانداری کۆبوونەوەی لوتکەی عەرەبی دەکات، سەرەڕای ناکۆکییە سیاسییەکان و تێبینی لەسەر پاشخانی ئەحمەد شەرعیش، بەڵام دوێنێ بە فەرمی و وەک سەرۆککۆماری سووریا، عێراق ناوبراوی بانگهێشتی لوتکەکە کرد.

 

زانیاریی بەدەستهاتوو: ڕادیۆی مۆنتیکارلۆی نێودەوڵەتی پاڵپشت سەرچاوەکانی لە بەغدا بڵاویکردووەتەوە، ڕۆژی 25ی ئەم مانگە و لەمیانی سەردانی شاندی عێراق بەسەرۆکایەتی حەمید شەتری، سەرۆکی دەزگای هەواڵگریی عێراق و کۆبوونەوەی لەگەڵ ئەحمەد شەرع سەرۆکی سووریا، شاندەکە پلانی ئەمنیی تایبەت بە پاراستنی ژیانی سەرۆکی سووریای لە میانەی بەشداریکردنی لە لوتکەی عەرەبی پێشکەش کردووە.

 

لەلایەکی دیکەوە: بەهۆی پێویستی هەماهەنگی هاوبەش لەبواری سنوور و ڕووبەڕووبوونەوەی تیرۆر، ئەم چەند مانگەی ڕابردوو بەغدا و دیمەشق زیاتر لەبواری ئەمنییدا کۆبوونەتەوە، لەم بارەیەوە مۆنتیکارلۆ ئاشکرای کردووە کە چوارچێوەی هەماهەنگی شیعەکان لەگەڵ ئەوەدانییە پەیوەندی سیاسی لەگەڵ ئەحمەد شەرع دروستبکرێت و دەیەوێت زیاتر پەیوەندییەکان ئەمنیی بن ئەوەش لە بەرژەوەندی باڵای عێراق دایە، بەهۆکاری ئەوەی "شەرع بە خوێنڕشتنی عێراقییەکان تۆمەتبارە و دژی حەشدی شەعبییە"، بەڵام سوودانی بە پێچەوانەی ئەم بۆچوونەیە و بە ئاڕاستەیەکی دیکە هەنگاو دەنێت.

 

خاڵە ئەرێنییەکان: شاندی عێراق و سووریا بۆ پاراستنی دامەزراوە دیپلۆماسییەکانی عێراق لە سووریا، پاراستنی شوێنە پیرۆزەکانی شیعە و بڵاوکردنەوەی هێزی ئەمنیی لەسەر سنوورە هاوبەشەکان گەیشتوونەتە ڕێککەوتن، هاوکات بۆ ڕووبەڕووبوونەوەی داعش، کردنەوەی سنووری وشکانیی، دەستپێکردنەوەی جوڵەی بازرگانی و گەشتە ئاسمانییەکانیش ڕێککەوتنیان ئەنجام داوە.