نەتەوەیەکگرتووەکان: کارەساتی مرۆیی لە غەززە ڕابگرن

ئاڤا نیوز

 

تادێت دۆخی کەرتی غەززە بەرەو خراپبوون دەچێت و نەتەوە یەکگرتووەکانیش داوا لە کۆمەڵگەی نێودەوڵەتیی دەکات، ''کارەساتی مرۆیی '' لە کەرتی غەززە ڕابگرێت.

 

وێنە گەورەکە: لە سەرەتای مانگی ئازارەوە، ئیسرائیل دەروازە سنوورییەکانی بۆ گەیاندی هاوکاری بۆ ناو غەززە ڕاگرت و بەمەش قەیران بەهۆی کەمی پێداویستی سەرەتاییەکان لە کەرتی غەززە دروست بووە، ڕێکخراوە نێودەوڵەتی و خۆبەشەکان هۆشداری دەدەن لەوەی دۆخی کەرتەکە بەرەو خراپبوون دەچێت، حاڵەتی مردنیش بەهۆی برسییبوونەوە تۆمار کراوە.

 
زانیاریی بەدەستهاتوو: ڤۆڵکەر تورک، کۆمیساریای باڵای مافەکانی مرۆڤی نەتەوە یەکگرتووەکان ڕایگەیاند، بەهۆی گەمارۆییەکانی ئیسرائیل و ڕێگرییکردن لە چوونە ژوورەوەی هاوکارییە مرۆییەکان، دۆخی کەرتی غەززە گەیشتۆتە حاڵەتێکی بێ وێنە، بۆیە پێویستە کۆمەڵگەی کارەساتی مرۆیی لە کەرتی غەززە ڕابگرێت، هەر جۆرە کردەوەیەک وەک برسیکردنی خەڵکی مەدەنی بە یەکێک لە تاوانەکانی جەنگ دادەنرێت.

 

لێدوانی فەرمی: وتەبێژی بەرنامەی خۆراکی جیهانی ڕایگەیاند، هێشتان ژمارەیەک بارهەڵگری هاوکارییمان لەسەر سنوور ماونەتەوە، چاوەڕێی کردنەوەی دەروازەکانین لەلایەن ئیسرائیلەوە.

 

ژمارەکان وادەڵێن: بەگوێرەی دواین ئاماری وەزارەتی تەندروستی غەززە، لە دەستپێکی شەڕی غەززەوە تاوەکو ئێستا 52 هەزار کەس کوژراون و زیاتر لە 117 هەزار کەسی دیکەش برینداربوون، ژمارەی قوربانییەکان بەهۆی هێرشە بەردەوامەکانی ئیسرائیل تادێت بەرز دەبێتەوە.