دۆخی خورماتوو بەرەو خراپی دەچێت و ژیانی جووتیارە کوردەکانیش دەکەوێتە مەترسییەوە

ئاڤا نیوز 

ململانێی زەوی لە گوندی تەپەسەوز لە قەزای خورماتوو سەری هەڵداوەتەوە و حەوت گرێبەستی زەوی نوێکراونەتەوە، ئەمەش هەڕەشەیەکی ڕاستەوخۆیە بۆ سەر مافی جووتیارانی کورد دروستبووەتەوە.

 

چیرۆکی سەرەکی: 21-1-2025 پەرلەمانی عێراق یاسای گەڕانەوەی زەوییە کشتووکاڵییەکانی بۆ خاوەنە ڕەسەنەکان پەسەندکرد کە داواکاری سەرەکی کورد بوو لە ناوچەکانی سنووری ماددەی 140 بە گشتی و پارێزگای کەرکووک بەتایبەتی، چونکە بەهۆیەوە ئەو زەویانەی جوتیارانی کورد کە بە بڕیاری حیزبی بەعس درابوون بە عەرەبی هاوردە، دووبارە بۆ خاوەنە ڕەسەنەکانیان دەگەڕێنرێتەوە.

 

ئەوەی پێویستە بیزانیت: ئەم هەنگاوە لەلایەن عەرەبە هاوردەکانەوە، مەترسی پێکدادانی توندوتیژی نێوان کورد و عەرەبی دروست کردووە، دۆخەکە ئاڵۆزتر بووە و هەر ساتێک دەکرێ بتەقێتەوە،

 

لێدوانی تایبەت:  جووتیارانی کوردی قەزاکە بە ئاڤا میدیایان وت:  بە توندی دژی ئەم بڕیارەن و دەشڵێن بەرگری لە زەویی و ماڵی خۆیان دەکەن. هۆشداری دەدەن ئەگەر چارەسەرێکی خێرا و دادپەروەرانە نەدۆزرێتەوە، دەکرێ ببێتە هۆی ناسەقامگیری زیاتر لە ناوچەکەدا.

بۆچی مەترسیدارە؟  وەک جووتیاران باسی دەکەن، بڕیاڕە لەم چەند ڕۆژەدا عەرەب بە پاڵپشتی سوپا و بڕیاری دادگا بێتە گوندەکەو ڕوپێوی بۆ زەویەکان بکات لە جوتیارانی کوردی وەربگرێتەوە و بیدات بە عەرەبی هاوردە. 

زانیاریی زیاتر: جوتیارانی کورد لە تەواوی ناوچەکە لە ئامادەباشیدان ڕایانگەیاند، خزم و کەسوکار و چەندین گوندی کوردنشینیان ئاگادار کردۆتەوە ، هەر کات عەرەب گەیشت بگەن بە هانایان، چونکە ئەوان ئامادەنین بستێک زەوی باوک و باپیرانیان بە عەرەب بدەین.

قووڵتر: لە کۆی 15 هەزار دۆنم زەوی زیاتر لە دوو هەزار  دۆنم ئێستا عەرەب گرێبەستەکەی تازە کردوونەتەوە.