حەوت لایەنی سیاسی لە کوردستان بە یەک لیست بەشداریی هەڵبژاردن دەکەن

ئاڤا نیوز

حەوت لایەنی سیاسیی دەرەوەی پارتی و یەکێتی، قسە لەسەر پلان و پرۆژەیەک دەکەن بۆ ئەوەی بە یەک لیست بەشداری لە هەڵبژاردنی پەرلەمانی عێراق بکەن کە بڕیارە مانگی یازدەی ئەمساڵ بکرێت.

وێنە گەورەکە: ئەمڕۆ لە شاری سلێمانی حەوت حیزبەکەی دەرەوەی پارتی و یەکێتی کە پێکدێن لە (یەکگرتوو، نەوەی نوێ، کۆمەڵ، بەرەی گەل، ڕەوتی هەڵوێست، گۆڕان و بزووتنەوەی پەیوەندیی ئیسلامی). کۆبوونەوەکە بە مەبەستی بڕیاردان بوو لە بارەی دروستکردنی هاوپەیمانێتییەک بۆ بەشداری لە هەڵبژاردنی پەرلەمانی عێراق، ئەوەی تا ئێستا لەسەری کۆکن دەیانەوێ بەگوێرەی ڕێژەی دەنگی لایەنەکان لە پارێزگاکان سەرۆک لیستەکان دابەش بکەن.

لێدوانی فەرمی: بێستوون حەمە ساڵح، بەرپرسی مەکتەبی هەڵبژاردنی کۆمەڵی دادگەری بە ئاڤای گوت، "کات لەبەرژەوەندی هیچ لایەکمان نییە، دەبێت لەزووترین ماوەدا یان هاوپەیمانێتی ڕابگەیێنین یان میکانیزمی دیکە بگرینەبەر، بەڵام بەشێوەیەکی گشتیی بیر و بۆچوونەکانمان لەیەکتر نزیکن."

ئەوەی پێویستە بیزانیت: جیا لە بزووتنەوەی پەیوەندیی ئیسلامی کوردستان کە هیچ کورسییەکی بەدەست نەهێنا، شەش حیزبەکەی دیکە لە دوایین هەڵبژاردنی پەرلەمانی کوردستان کە لە کۆتاییەکانی ساڵی ڕابردوو بەڕێوەچوو، 32 کورسییان بەدەستهێنا.