ئاڤا بەدواداچوون بۆ گرفتی خانووە حكوومییەكان دەكات

ئاڤا نیوز

 

حكومەتی هەرێمی كوردستان ساڵانێكە ژمارەیەك خانووی لە شار و شارۆچكەكانی هەرێمی كوردستان بە فەرمانبەرانی وەزارەت و فەرمانگە جۆراوجۆرەكان داوە و ئێستا فەرمانبەرەكان داوای بەناوكردنیان دەكەن، بەڵام وەزارەتەكان ئامادە نین ئەم كارە بكەن، بەپێی بەدواداچوونێكی ئاڤا میدیاش جیاكاری لەنێوان فەرمانبەرەكان دەكرێت.

 

چیرۆكی سەرەكی: نۆ خانەوادە لە سۆران كە لەنێو خانووی موڵكی وەزارەتی تەندروستیدا دەژین و ماوەی زیاتر لە سێ ساڵە پێیان دراوە و لەو ماوەیەدا دەستكاریی خانووەكانیان كردووە و بڕێك پارەیان لێ خەرج كردووە، داوای بەناوكردنی خانووەكانیان دەكەن، بەڵام تاوەكوو ئێستا وەڵامی ئەرێنییان نەدراوەتە ئەمە سەرەڕای بڕیاری ئەنجوومەنی وەزیران و وەزارەتەكانی ناوخۆ و دارایی، بەپێی بەدواداچوونی ئاڤا میدیا ئەم گرفتە لە چەند ناوچەیەكی دیكەی هەرێمی كوردستان هەیە و زۆرینەی فەرمانگە و وەزارەتەكان لە هەمان چوارچێوەدا گرفتیان هەیە.

زانیاریی بەدەستهاتوو: حکومەتی هەرێمی کوردستان بە دوو بڕیار لە ساڵانی 1998 و 2013 بڕیاری داوە بە تاپۆكردنی خانووە حکومییەکان بە ناوی نیشتەجێبووانیان، ساڵی ڕابردوو بە دیاریکراوی لە بەرواری 8-1-2024، سەرۆکایەتیی ئەنجوومەنی وەزیران نووسراوێکی ئاراستەی وەزارەتی دارایی و ئابووریی کردووە، بۆ ئەوەی خانووەکانیان بەناو بکرێن لە ماوەی سێ مانگدا، هەروەها وەزارەتی داراییش لە 29-1-2024  بە واژووی ئاوات شێخ جەناب، نووسراوێکی بۆ گشت وەزارەت و دەستەکانی نەبەستراو بە وەزارەت کردووە، داتای موڵکەکانیان بنێرن ئەوانەی فەرمانبەران تیایانا نیشتەجێن بۆ ئەوەی هەر مامەڵەیەك مابێت کاری پێویستی لەسەر بکەن.

 

قووڵتر: بەپێی بەدواداچوونی ئاڤا میدیا و گوتەی ئەو كەسانەی كەلەنێو خانووی حكومیدان، وێڕای چەند بڕیاری فەرمی بەڵام وەزارەت و فەرمانگەكان تاوەكوو ئێستا ئامادە نین خانووەكان بەناوی ئەو كەسانەوە بكەن.

 

لەلایەكی دیكەوە: یەكێك لەو فەرمانبەرانەی سۆران كە ئەم كێشەیەی هەیە بە ئاڤا میدیای ڕاگەیاند كە چەند خانوویێك بە ڕێگای جۆراوجۆر بە ناوی فەرمانبەرەكان كراون بەڵام وەزارەتی تەندروستی ئامادە نییە شەش خانووەكەی دیكە بە ناوی فەرمانبەرەكانیەوە بكات، ئەمەش جیاكارییەكی ڕوون و ئاشكرای وەزارەتەكەیە لەنێوان خاوەنی خانووەكان.