وەزیرانی دەرەوەی وڵاتانی عەرەبی لە بەغدا کۆدەبنەوە

ئاڤا نیوز

ئامادەکارییەکان بۆ هەردوو لووتکەی عەرەبی و گەشەپێدان لە بەغدا لەکۆتایی نزیک بوونەتەوە، ئەمڕۆ نوێنەری وڵاتان لە کۆمکاری عەرەبی و بەیانیش وەزیرانی دەرەوەی وڵاتانی عەرەبی کۆدەبنەوە.

وێنە گەورەکە: 17ـی ئەم مانگە لووتکەی وڵاتانی عەرەبی لە بەغدا بەڕێوەدەچێت و بۆ ئەم کۆبوونەوەیە پادشا و سەرۆکی هەر 22 وڵاتەکەی ئەندام لە کۆمکاری عەرەبی بانگهێشتکراون، بەڵام بەشێکیان هەرزوو ڕایانگەیاندووە کە لەبری خۆیان شاند دەنێرن.

ڕاگەیێنراوی فەرمی: بەگوێرەی خشتەی لووتکەی عەرەبی، ئەمڕۆ چوارشەممە نوێنەری وڵاتان لە کۆمکاری عەرەبی و گەورە بەرپرسان لە بەغدا کۆدەبنەوە و کۆتا ئامادەکارییەکان بۆ لووتکەی عەرەبی و کۆبوونەوەی بەیانی وەزیرانی دەرەوە تاوتوێ دەکەن.
 
سبەی پێنجشەممەش کۆبوونەوەی وەزیرانی دەرەوەی وڵاتانی عەرەبی لە بەغدا بەڕێوەدەچێت، تیایدا ئەو پرس و تەوەر و بابەتانە یەکلایی دەکرێنەوە کە لەکۆبوونەوەی ڕۆژی شەممەدا پێویست دەکات سەرۆک و پادشای وڵاتانی عەرەبی ڕاسپاردە و بڕیاریان لەسەر دەربکەن، چاوەڕێش دەکرێت پرسی فەڵەستین، کێشە ئابوورییەکان و بەهێزکردنی هەماهەنگی بۆ ڕووبەڕووبوونەوەی ئاستەنگییە سیاسیی و سەربازییەکان دیارترین تەوەری کۆبوونەوەکان بن.