پێشەوا هەورامانی: لەمەودوا 80%ی خەڵك پارەی کەمتر بۆ کارەبا دەدەن

ئاڤا نیوز

لە کۆبوونەوەی ئەمڕۆی ئەنجوومەنی وەزیران ڕاپۆرتێک دەربارەی، كەمكردنەوەی تێچووی بەكارهێنان، ڕێگری لە بەهەدەردان، هاوسەنگی لە دابەشكردنی کارەبا، پاراستنی ژینگە و تەندورستی گشتی خوێنرایەوە، وتەبێژی حکومەتیش دەڵێت، لە پڕۆژەی ڕووناکی 80%ـی خەڵک بەراورد بەڕابردوو پارەی کەمتر دەدەن.

وێنە گەورەکە: پڕۆژەی ڕووناکی یەکێکە لە پڕۆژە گرنگەکانی کابینەی نۆیەمی حوکمەتی هەرێمی کوردستان، تا دێت فراوانتر دەبێت و ئامانجەکە ئەوەیە، کارەبای 600 هەزار هاووڵاتی لە هەولێر، سلێمانی و دهۆک بووەتە 24 کاتژمێری.

لێدوانی فەرمی: پێشەوا هەورامانی، وتەبێژی حکومەتی هەرێمی کوردستان لە کۆنگرەیەکی ڕۆژنامەوانیدا سەبارەت بە پڕۆژەی ڕووناکی گوتی: لیژنەیەکی باڵا بەسەرپەرشتی سەرۆکوەزیران مەسرور بارزانی چاودێری پڕۆژەی ڕووناکی دەکات.

- نرخی کارەبای پڕۆژەی ڕووناکی دوای تەواوبوونی لە هەموو هەرێمی کوردستان یەک نرخ دەبێت.

- لە پڕۆژەی ڕووناکی لەمەودوا 80%ـی هاونیشتمانیان پارەی کەمتر بەراورد بەڕابردوو دەدەن.

ئەوەی پێویستە بیزانیت: تاوەکو کۆتایی ساڵی 2025، کارەبای 24 کاتژمێری دەگاتە سەرجەم شارەکان، هاوکات بەهۆی پڕۆژەی ڕووناکییەوە  تاوەکو ئێستا 729 مۆلیدەی گەڕەکەکان کوژێنراونەتەوە کە دەکاتە 10%ـی مۆلیدەکانی هەموو هەرێمی کوردستان.