سەرۆك بارزانی: عێراق پابەندی دەستوور نەبووە

ئاڤا نیوز

 

سەرۆك بارزانی لە چوارچێوەی گوتارێکدا لە كۆنگرەی یەكگرتنی هەردوو ڕێكخراوی یەكێتی قوتابیان و یەكێتی لاوانی کوردستان ڕەخنەی توندی لە بەرپرسانی عێراق گرت و گوتی، بەهیچ شێوەیەك پابەندی دەستوور و سێ بنەمای هاوبەشی، سازان، یەكسانی نەبوون. گوتیشی "تەنیا پابەندبوون بە دەستوور سێ بنەماكە دۆخی ئێستای عێراق چارەسەر دەكات".

 

وێنە گەورەکە: ئەمڕۆ پێنجشەممە، ڕێککەوتی 15ـی 5ـی 2025، کۆنگرەی یەکگرتنی یەکێتیی قوتابیان و یەکێتیی لاوانی کوردستان لە شاری هەولێر بەسەرپەرشتی سەرۆک بارزانی و بە ئامادەبوونی مەسرور بارزانی، جێگری سەرۆکی پارتی دیموکراتی کوردستان بەڕێوەچوو. سەرۆک بارزانی وتارێکی پێشکەش کرد و لەبارەی چەند پرسێکی هەنووکەیی لە هەرێمی کوردستان و عێراق و ناوچەکە قسەی کرد.

 

پەیامی فەرمی: سەرۆك بارزانی ڕایگەیاند: دوای ساڵی 2003 هەلێكی زێڕین لە عێراق هاتە پێش و هەمووانیش دەزانن كە كورد و خەڵكی كوردستان ڕۆڵێكی سەرەكییان بینی لە ڕووخاندنی ڕژێمی بەعس،  دوای ڕووخانی ڕژێمیش بە بڕیاری پەرلەمان بڕیار درا بگەڕێینەوە بۆ بەغدا و عێراقێكی تازە بونیاد بنێین.

 

سەرۆک بارزانی باسی لە سێ بنەما کرد کە دوای ساڵی 2003 عێراقی لەسەر بوندیاد نرایەوە و گوتی، "لەسەر سێ بنەمای بنچینەیی ڕێككەوتین كە عێراقی تازە بونیاد بنرێتەوە،  ئەوانیش بریتی بوون لە: هاوبەشی، یەكسانی، سازان، دوای ئەوە هەنگاوی زۆر گرنگ نرا كە دەستوور بوو لە ساڵی 2005،  بە هەموو نیازێكی پاك و هێز و توانایەكەوە هەوڵمان دا كە عێراقێكی فیدڕاڵی لەسەر ئەو سێ بنەمایە بونیاد بنرێتەوە.

 

لەبەشێکی دیکەی گوتارەکەیدا سەرۆک بارزانی گوتیشی، "ئیتر یان دەبێت لەسەر ئەو سێ بنەمایە، عێراق بەڕێوە چێت، ئێستاش و داهاتووش هاوكات بە پابەندبوون و ڕێنیشاندەریی دەستوور، دەتوانرێت دۆخی ئێستای عێراق جێبەجێ بكات.

 

سەرۆک بارزانی ئاماژەی بۆ ئەوەش کرد، "ئەگەر لایەنێك پێی وابێت كە زۆرینەیە و بیەوێت خۆی بسەپێنێت، ئەوا عێراق خێر لە خۆی نابینێت و ئەو بۆچوونە سەریش ناكەوێت، ئەگەر پێكەوە بین دەتوانین هەموومان یارمەتیدەر و پشتیوانی یەكتر بین، بەڵام نەبووە لە دونیا خەڵكێك بهێنیت و بەزۆر پێكەوەیان بنێیت، لە دەستووریش هاتووە كە عێراق لە نەتەوە و ئایین و مەزهەبی جیاواز پێكدێت،  بەزۆر ناتوانیت وا بكەیت ئەمانە یەك بگرن، ئەمەش بە سیاسەتێكی ڕاست و ڕەوان جێبەجێ دەبێت بۆ ئەمەش دەستوور بنەمایە.

هەرچی پەیوەستە بە سەرژمێری و هەڵبژاردن، سەرۆک بارزانی دەشڵێت "عێراق نە بە دەستوور، نە بە سێ بنەمایەكە پابەند نەبوون. گوتیشی، "ئێستا ئەگەر هەموو لایەنەكان بیانەوێت عێراق سەقامگیر بێت و خەڵكەكەی بەختەوەر بێت دەبێت بگەڕێنەوە بۆ ئەو سێ بنەمایە ئەگەر نا با سەرژمێرییەك بكرێت و نەتەوە و ئایین و مەزهەبی تێدا بێت، مادام بەرەو ئەوە دەچن با سەرژمێرییەك بكرێت، ئەو كاتە كەس گلەیی ناكات، یان ئەگەر هەڵبژاردن دەكرێت با یەك بازنە بێت.