هۆشیار زێباری: گرووپە چەکدارەکان هۆکاری کەمی ڕێژەی بەشداریی سەرکردەکان بوو لە لووتکەی عەرەبی

ئاڤا نیوز

 

وەزیری پێشووتری دەرەوەی عێراق، گرووپە چەکدارەکانی شیعە و بەشێک لەلایەن سیاسییەکان، بەوە تۆمەتبار دەکات کە هۆکاربوون لە کەمی ڕێژەی بەشداریی سەرۆک و سەرکردەکانی عەرەب لە لووتکەی کۆمکاری عەرەبی  لە بەغدا

 

وێنە گەورەکە: ڕۆژی شەممە، ڕێککەوتی 17ـی 5ـی 2025، 34ـەمین لووتکەی عەرەبی لە بەغدا بەڕێوەچوو، لە کۆی 22 وڵاتی ئەندام لە کۆمکاری عەرەبی، بە عێراقەوە سەرۆک و کەسی یەکەمی تەنیا شەش وڵات ئامادەبوون، بەوەش بووە خراپترین لووتکە لەڕووی ئامادەبوونی سەرکردەی وڵاتانەوە.

 

ڕاگەیێنراوی فەرمی: هۆشیار زێباری، وەزیری پێشووتری دەرەوەی عێراق لە تۆڕی ئێکس ڕایگەیاند: 34ـەمین لووتکەی عەرەبی بەغدا بە هەستێکی دوولایەنە بەڕێوەچوو، حکومەت و ئەمینداریەتیی گشتیی کۆمکاری عەرەبی و جەنابی ئەمینداری گشتی هەوڵی ناوازەیان دا، لەبەرامبەردا هەڵوێستی سیاسییەکانی گرووپە چەکدارەکان و بەشێک لە لایەنەکان کە هەڵوێستێکی نەرێنییان بەرامبەر عەرەب نواند، لووتکەکەیان لە ئامادەبوونی پێویستی عەرەب لە وڵاتێکی "هاروونە ڕەشید" بێبەش کرد، ئەمەش پێویستی بە پێداچوونەوە هەیە.

 

ئەوەی پێویستە بیزانیت: لەپاڵ کەمی ڕێژەی بەشداربووانی سەرانی وڵاتانی عەرەب، شێخ تەمیم بن حەمەد ئال سانی، میری قەتەر و شاندی ئیماڕات لەمیانی بەڕێوەچوونی لووتکەکەدا کشانەوە و وتاری خۆیان پێشکەش نەکرد.