وەزارەتی دارایی عێراق تەمەنی یاسایی خانەنشینی دیاری دەکات

ئاڤا نیوز

بەشی یاسایی لە وەزارەتی دارایی عێراق، لە ڕوونکرنەوەیەکدا سەبارەت بە تەواوکردنی تەمەنی یاسایی بۆ خانەنشینی. ئاماژە بۆ ئەوە دەکات 60 ساڵ تەمەن، تەمەنی یاساییە بۆ خانەنشینی بەبێ گوێدان بە ماوەی خزمەت.

نووسراوی فەرمی: بەگوێرەی نووسراوێکی فەرمی وەزارەتی دارایی عێراق کە ئاراستەی سەرجەم وەزارەت و دامەزراوە حکومییەکان کراوە (ئەنجوومەنی نوێنەران، ئەنجوومەنی باڵای دادوەری، هتد.)، ڕوونی دەکاتەوە کە خانەنشینکردن دوای تەواوکردنی دوایەمین ڕۆژی تەمەنی 60 ساڵ جێبەجێ دەکرێت.

زانیاریی زیاتر: ڕوونکردنەوەکەی وەزارەتی دارایی سەبارەت بە ماددەی (10/یەکەم)ـە لە یاسای خانەنشینی یەکگرتوو ژمارە (9)ـی ساڵی 2014، هەموارکراو بە یاسای ژمارە (26)ـی ساڵی 2019 و ئاماژە بۆ ئەوە دەکات، خانەنشینی دوای تەواوکردنی دوایەمین ڕۆژی تەمەنی 60 ساڵ جێبەجێ دەکرێت، نەک لە یەکەم ڕۆژی تەواوکردنی ئەو تەمەنە.

وەزارەتی دارایی عێراق خشتەیەکی لەبارەی تەمەنی خانەنشینی و ماوەی خزمەت بڵاوکردووەتەوە، بەگوێرەی خشتەکە ئەگەر کەسێک لە دایکبووی 1-5-1965 بێت لە 1-5-2024 تەمەنی دەچێتە نێو 60 ساڵ، بەڵام لە 1-5-2025 کاتێک 60 ساڵەکە تەواو دەکات ئینجا خانەنشین دەبێت، بەبێ گوێدان بە ماوەی خزمەتەکەی.


ئەوەی پێویستە بیزانیت: بەگوێرەی یاسای یەکگرتووی خانەنشینی عێراق ئەگەر کەسێک تەمەنی گەیشتە 60 ساڵ و ماوەی خزمەتەکەی لە 15 ساڵ کەمتر بێت، ئەوا خانەنشین نابێت و تەنیا پاداشتی خزمەت وەردەگرێت.

خشتەی تەمەنی خانەنشینی