ڕۆژانە 150 بارهەڵگر سەوزە و میوە لە هەولێرەوە هەناردە دەکرێت

ئاڤا نیوز

کشتوکاڵی هەولێر بەردەوامە لە پێدانی پشتگیری بە جووتیارانی سنووری پارێزگای هەولێر بۆ هەناردەکردنی بەرهەمەکانیان، بەڕێوەبەری کشتوکاڵی هەولێر دەڵێت، هەموو ڕۆژێک 150 پشتگیری بۆ هەناردەکردن دەدرێت.

وێنە گەورەکە: ساڵانە لە دەستپێکی وەرزی هاوین، هەناردەکردنی بەرهەمی ناوخۆیی شارەکانی کوردستان بۆ پارێزگاکانی ناوەڕاست و خوارووی عێراق دەستپێدەکات، ئەو بەرهەمانەی ئێستا لە هەولێرەوە هەناردە دەکرێن پەتاتە، ترۆزی، خەیار، کودی، پیاز و شوتییە.

لێدوانی فەرمی: هێمن سەید موراد، بەڕێوەبەری گشتیی کشتوکاڵی هەولێر بە ئاڤا میدیای وت، ڕۆژانی هەینیش بەردەوامین لە پێدانی پشتگیری بە جووتیاران، هەر پشتگیرییەک بۆ بارهەڵگرێکی 10 تا 20 تۆنییە، ڕۆژانە سێ هەزار تۆن هەناردە دەکرێت، ئەو ژمارەیە مانگانە دەکاتە 90 هەزار تۆن، ئامانج ئەوەیە ئەمساڵ ڕێژەکە لە ساڵی پار زیاتر بێت، ساڵی ڕابردوو 750 هەزار تۆن سەوزە و میوە هەناردە کرابوو.

بەڕێوەبەری گشتی کشتوکاڵی هەولێر ئەمانەشی وت:

٠ لەلایەن بازگەکانی عێراق سەرئێشە بۆ جووتیارانی کوردستان دروست دەکرێت، چەند سەعات لە بازگەکان ڕادەگیرێن و گرفتیان بۆ دروست دەکەن و تەنانەت بارهەڵگر دەگەڕێنرێتەوە.

٠ ئەو بارهەڵگرەی سەرووی 20 تۆنی بێت و ساردکەرەوەی پێوەبێت ناهێڵن بچێتە شارەکانی دیکەی عێراق.

٠ پەتاتە خواستی زۆری لەسەرە و لە عەلوەی هەولێر هەر کیلۆیەکی 400 دینار دەکات.

٠ بە نیازن لە هەفتەی داهاتووەوە، جگە لە بەیانیان، ئێوارانیش لە کاتژمێر چوار تا شەش پشتگیری بۆ جووتیاران بکەن.