هەسەدە لە ڕۆژهەڵاتی سووریا هێرشێکی داعش تێکدەشکێنێت

ئاڤا نیوز

 

هێزەکانی سووریای دیموکرات (هەسەدە) ڕایگەیاند، لە دەورووبەری شاری دێرەزوری ڕۆژهەڵاتی سووریا هێزەکانیان پیلانی هێرشێکی شانە نوستووەکانی داعشیان تێکشکاندووە و چەکدارێکی ڕێکخراوەکەش کوژراوە.

 

وێنە گەورەکە: بەوتەی بەرپرسانی هەسەدە، دوای ڕووخانی دەسەڵاتەکەی ئەسەد، داعش ژمارەیەکی زۆر چەک و کەرەستەی سەربازی لە سووپای پێشووی سووریا دەستکەوتووە و ئەوەش توانای ڕێکخراوەکەی بۆ ئەنجامدانی هێرشی سەربازیی زیاترکردووە.

 

ڕاگەیێنراوی فەرمی: هەسەدە لە ڕاگەیێنراوەکەیدا دەڵێت، شەوی ڕابردوو لەلایەن خەڵکی شارۆچکەی درنج لە دەوروبەری شاری دێرەزور لە جوڵەی گوماناوی گرووپێکی چەکداریی ئاگادارکراونەتەوە، دواتریش هێزەکانیان ئەو گرووپەیان گەمارۆداوە و ڕووبەڕووبوونەوە ڕوویداوە، لە ئەنجامیشدا چەکدارێک کوژراوە و چەکدارێکی دیکەش هەڵاتووە.

 

زانیاریی زیاتر: ئەو گرووپە بەنیازبوون لەڕێگەی دانانی بۆمبی چێنراو کاروانی هێزەکانی هەسەدە بکەنە ئامانج، بەڵام هەسەدە دەڵێت، پیلانەکە پوچەڵکراوەتەوە و هێرشەکەش شکستی پێهێنراوە.