پاسەوانی سنووری عێراق: لەگەڵ کوردستان هەماهەنگییەکانمان پتەوتر دەکەین

ئاڤا نیوز

فەرماندەی هێزەکانی پاسەوانی سنووری عێراق لەگەڵ وەزیری ناوخۆی هەرێمی کوردستان کۆبووەوە و ڕایگەیاند، هەماهەنگیی و ڕێکارەکان بۆ پاراستنی سنوور لەگەڵ کوردستان پتەوتر دەکەن.

ئەوەی پێویستە بیزانیت: فەرماندەیی ناوچەی یەکی پاسەوانی سنووری عێراق دەکەوێتە هەرێمی کوردستان و ئەرکیان پاراستنی سنوورەکانە لە زاخۆوە تاوەکو خانەقین.

ڕاگەیێنراوی فەرمی: فەرماندەیی هێزەکانی پاسەوانی سنووری عێراق بڵاویکردەوە، ئەمڕۆ سێشەممە فەریق محەممەد عەبدولوەهاب سوکەر، فەرماندەی هێزەکانی پاسەوانی سنوور لە هەولێر لەگەڵ ڕێبەر ئەحمەد، وەزیری ناوخۆی کوردستان کۆبووەتەوە، لەکۆبوونەوەکەشدا باس لە هەماهەنگی و کاری پێکەوەیی کراوە بۆ پاراستنی سنوور و بەهێزکردنی ڕێکارە ئەمنییەکان بۆ ڕووبەڕووبوونەوەی ئاستەنگیی و هەڕەشەکانی سەر سنوور.

- لەکۆبوونەوەکەدا جەخت لە هاوکاریی مەیدانیی و ئاڵوگۆڕی زانیاریی کراوە بەمەبەستی باشترکردنی ئاسایشی سنوورەکان، بۆ ئەو مەبەستەش کۆبوونەوەکان و هەماهەنگی ڕاستەوخۆ بۆ گەیشتن بە ئامانجە ئەمنییە هاوبەشەکان بەردەوام دەبن.