دەم پارتی كاندیدی خۆی بۆ پۆستی سەرۆكی پەرلەمانی توركیا دیاری دەكات

ئاڤا نیوز

دەم پارتی، جەنگیز چاندار، نوێنەری پارێزگای ئامەد، وەك كاندیدی پارتەكە بۆ پۆستی سەرۆكی پەرلەمانی توركیا تۆمار دەكات.

وێنە گەورەكە: پرۆسەی هەڵبژاردنی سەرۆكایەتی پەرلەمانی توركیا لە ڕۆژی 28ـی ئایارەوە دەستیپێكردووە و تاوەكو پێنج ڕۆژ، ناوی كاندیدەكان بۆ ئەو پۆستە تۆمار دەكرێت، لەماوەی پێنج ڕۆژی دواتریشدا، هەڵبژاردن دەكرێت، هەڵبژاردنی سەرۆكی نوێی پەرلەمانیش لە 3ـی حوزەیران بەشێوەی دەنگدانی نهێنی ئەنجام دەدرێت.

زانیاریی بەدەستهاتوو: بەگوێرەی میدیاكانی توركیا، پارتی یەكسانیی و دیموكراسیی گەلان 'دەم پارتی'، پەرلەمانتار جەنگیز چاندار، نوێنەری پارێزگای ئامەدی وەك كاندیدی خۆی بۆ پۆستی سەرۆكی پەرلەمانی توركیا تۆماركرد و، بۆ ئەم مەبەستەش سەردانی سكرتاریەتی گشتیی سەرۆكایەتی پەرلەمانی كرد.

ئەوەی پێشبینی دەكرێت: بەگوێرەی زانیارییەکان و بەئەگەرێكی زۆرەوە، نوعمان كورتولموش، سەرۆكی ئێستای پەرلەمان و کاندیدی ئاکەپە و مەهەپە، دووبارە دەبێتەوە سەرۆكی پەرلەمانی توركیا، كە لەوەتەی 7-6-2023ـەوە لەو پۆستەیە.