ئەمریکا پێناسی گومرگی لەسەر پۆڵا و ئەلەمنیۆم دەگەیێنێتە دوو هێندە

ئاڤا نیوز 

 

ئەمریکا ڕێژەی پێناسی گومرگی لەسەر پۆڵا و ئەلەمنیۆم کردە 50%. چاوەڕوانیش دەکرێت ئەم هەنگاوە جگە لە کۆمپانیاکانی دروستکردنی ئۆتۆمبێل، کاریگەری بکاتە سەر کارگەکانی بەرهەمهێنانی قوتوی خواردنەوە گازییەکان.

 

وێنە گەورەکە: کاتژمێر حەوتی بەیانیی ڕۆژی چوارشەممە بە کاتی کوردستان، ئیدارەی ترەمپ ڕێژەی پێناسی گومرگی لەسەر هاوردەکردنی پۆڵا و ئەلەمنیۆم بۆ ناو ئەمریکا گەیاندە دوو ئەوەندەی پێشووی، بەم کارەشی دەیەوێت پەرە بە بەرهەمی ناوخۆیی وڵاتەکەی بدات.

 

لێدوانی فەرمی: کوش دێسای، جێگری سکرتێری ڕۆژنامەوانیی کۆشکی سپی ڕایگەیاند، بەرهەمهێنانی پۆڵا و ئەلەمنیۆم لە ناوخۆی ئەمریکا بۆ سێکتەری بەرگری-پیشەسازیمان زۆر گرنگە و ئەم بابەتە گرنگە بۆ ئاسایشی نیشتمانی و ئابووریی ئەمریکا.
 
باکگراوند: ترەمپ لە مانگی دووی ئەمساڵدا بەڕێژەی 25% پێناسی گومرگی لەسەر هاوردەکردنی پۆڵا ڕاگەیاند، ئەمەش بەشێکە لە هەوڵێکی فراوانتری کۆشکی سپی بۆ زیندووکردنەوەی بەرهەمی ناوچە پیشەسازییەکانی و زیادکردنی هەلی کار لە بواری بەرهەمهێناندا.