ئاژانسی وزەی ئەتۆم: ئێران پابەندی بەرنامە ئەتۆمییەکەی نەبووە

ئاڤا نیوز

ئەنجوومەنی پارێزگارانی ئاژانسی نێودەوڵەتیی وزەی ئەتۆم بە زۆرینەی دەنگ بڕیاریدا کە کۆماری ئیسلامیی ئێران پابەندی ئەرکەکانی نەبووە سەبارەت بە بەرنامە ئەتۆمییەکەی، بەم هۆیەشەوە ئەگەری سەپاندنی سزای زیاتر بەسەر ئێران زیاتر دەبێت.

ڕاگەیێنراوی فەرمی: ئەنجوومەنی ئاژانسی نێودەوڵەتیی وزەی ئەتۆم ڕایگەیاند: بۆ یەکەمجار لە 20 ساڵی ڕابردوودا، ئێران پابەندی ئەرک و گەرەنتییەکانی پەیوەست بە بەرنامە ئەتۆمییەکەی نەبووە.

زانیاریی زیاتر: ئەنجوومەنەکە دەشڵێت: بە پشتگیریی دەنگی 19 وڵات بڕیاریاندا کە ئێران پابەندی بەرنامە ئەتۆمییەکەی نەبووە لە کاتێکدا تەنیا سێ وڵات دژی بڕیارەکە دەنگیان داوە، هاوکات 11 وڵات ڕەتیان کردەوە دەنگ بدەن.

ئەوەی پێشبینی دەکرێت: ئەم بڕیارە ڕێگە خۆشکەر دەبێت بۆ ئەوەی سزای زیاتری نێودەوڵەتی بەسەر ئێران و بەرنامە ئەتۆمییەکەی بسەپێنرێت.

لە لایەکی دیکەوە: وەزارەتی دەرەوە و دەستەی وزەی ئەتۆمی ئێران لە ڕاگەیێنراوێکدا، سەرکۆنەی ئەو بڕیارەی ئاژانسی نێودەوڵەتیی وزەی ئەتۆمیان کرد و بە سیاسی وەسفییان کرد.